Kolegji Zgjedhor vijon të certifikojë zgjedhjet, jep mandate në 13 bashki
Kolegji Zgjedhor iu dha këtë të martë mandatet këshillave bashkiakë në 13 bashki të vendit. Pamundësia e KQZ- së për të pasur një vendimmarrje me 5 vota, për shkak të kundërshtisë së kryetarit Klement Zguri, detyroi socialistët t’i drejtohen Gjykatës për marrjen e mandateve. Bashkitë, në të cilat këshilltarët bashkiakë morën vendimin e gjykatës, ishin: Fushë- Arrëzi, Mirdita, Vau i Dejës, Mati, Delvina, Roskoveci, Kavaja, Peqini, Dropulli, Pogradeci, Pusteci, Puka dhe Finiqi. Në këtë mënyrë ka shkuar në 20 numri i bashkive që kanë marrë konfirmimin e mandateve në Kolegjin Zgjedhor, ndërkohë që 41 bashki të tjera pritet të merren në shqyrtim gjatë kësaj jave. Kur të 61 njësitë administrative në të gjithë vendin të jenë të pajisura me një vendim të Kolegjit Zgjedhor për marrjen e mandateve, do të jetë Komisioni Qendror i Zgjedhjeve që do të miratojë tabelën kombëtare të rezultateve për zgjedhjet e 30 qershorit. Vetëm kur të jetë miratuar tabela kombëtare e rezultateve nga KQZ, këshillat bashkiakë do të mblidhen për t’i hapur rrugë betimit të drejtuesve të rinj lokalë. Në këto zgjedhje, PS, e cila konkurroi e vetme pa pjesëmarrjen e opozitës, fitoi të 61 bashkitë, ku në 60 prej tyre konkurronte me kandidatët e saj, ndërkohë që në Finiq fitoi kandidati i mbështetur nga socialistët. Për opozitën, beteja për zgjedhjet e 30 qershorit është zhvendosur e gjitha në dyert e gjyqësorit. Shoqata e Bashkive ka kërkuar rrëzimin e zgjedhjeve të 30 qershorit përmes pretendimit se Presidenti i Republikës anuloi procesin në këtë datë. Ndërkohë që edhe PD zyrtarisht ka kërkuar nga Kolegji Zgjedhor pezullimin e dhënies së mandateve deri në një vendimmarrje të Gjykatës Kushtetuese.