Gara për Kryeprokuror, Olsian Çela kalon vetingun
KPK konfirmon në detyrë rivalin kryesor të Arta Markut
Komisioni i Pavarur i Kualifikimit konfirmoi dje në detyrë prokurorin e Krimeve të Rënda, Olsian Çela, kandidat për postin e Kryeprokurorit, rivali kryesor i Arta Markut. Vendimi u dha dje nga kryesuesi i trupës, Lulzim Hamitaj, relator Olsi Komnçini dhe anëtare, Brunilda Bekteshi. Konfirmimi në detyrë i Olsian Çelës i hap rrugën garës për postin e Prokurorit të Përgjithshëm, edhe pse duhet pritur edhe zbardhja e vendimit të KPK- së, apo nëse do të ketë ankim ndaj këtij vendimi. Prokurori pranë Prokurorisë së Shkallës së Parë për Krime të Rënda, Olsian Çela, u përball me vetingun për tri kriteret e verifikimit, si ligjshmëria e pasurisë, pastërtinë e figurës dhe atë profesional. Çela ishte i pari prokuror që shpalli kandidaturën e tij për vendin e Prokurorit të Përgjithshëm, megjithëse ishte i fundit që kaloi vetingun. Edhe më herët, emri i prokurorit Olsian Çela është përmendur si një kandidaturë e mundshme, ashtu si edhe ajo e Prokurores së përkohshme të Përgjithshme, Arta Marku. Gara për Prokuror të Përgjithshëm u hap më 29 mars. Në fund të qershorit, Këshilli i Lartë i Prokurorisë i nisi një shkresë KPK- së që të kryente sa më parë procesin e vlerësimit kalimtar për kandidatin për Prokuror të Përgjithshëm, Olsian Çela. Ndonëse ishte përcaktuar muaji qershor si afat i përzgjedhjes së tre kandidatëve për Kryeprokuror, ky proces u zgjat pa ndonjë afat, pasi Çela nuk ishte përballur me procesin e vetingut, i vetmi nga tre kandidatët. Njoftimi i nisur nga KLP- ja ishte i dyti pas 45 ditësh nga letra e parë, për shkak të një reagimi nga KPK- ja. Lulzim Alushaj, me profesion avokat, nuk përballet me KPK- në pasi filtrohet nga Këshilli i Lartë i Prokurorisë, ndërsa në garë janë edhe Arta Marku e Fatjona Memçaj, që janë konfirmuar në detyrë. Kandidati për Prokurorinë e Përgjithshme, Olsian Çela, doli të premten para Komisionit të Pavarur të Kualifikimit, i cili e kishte hetuar atë në të tria kriteret. Në një seancë që zgjati rreth dy orë, prokurori i Krimeve të Rënda, më herët edhe drejtues i kësaj Prokurorie, dëgjoi rezultatet e hetimit ndaj tij dhe dha shpjegime në lidhje me disa problematika të ngritura nga treshja që kishte kryer hetimin.