Hidhet në erë memoriali i heroit grek, reagon Greqia: Gjeni autorët
SARANDË – Memoriali i heroit kontrovers grek, Thimio Loli, është hedhur në erë shtatë muaj pas vandalizmit. Në memorialin që ndodhet në fshatin Kranë të Bashkisë Finiq, ka ndodhur një shpërthim gjatë natës. Pas shpërthimit të fortë, banorët kanë konstatuar dëmtime të memorialit të rindërtuar nga banorët e fshatit minoritar. Nga shpërthimi është dëmtuar kopshti i fëmijëve, që ndodhet përballë memorialit. Afër tij ndodhet gjithashtu edhe kisha e Shën Jorgjit, e cila gjithashtu ka pësuar disa dëme nga tronditja. Ndërkohë, te një mur afër memorialit është shkruar me bojë të kuqe “Çamëria”. “Jam nga qyteti i Librazhdit. Punoj dhe jetoj në këtë fshat prej 6 muajsh. Po ngrihesha për t’u bërë gati për punë. Mbas orës 03: 30 dëgjova një shpërthim të fortë. Dola jashtë të shihja mos shpërtheu ndonjë bombol gazi”, u shpreh Stavri Mema. Policia ka nisur hetimet për zbardhjen e ngjarjes, ndërkohë që për ngjarjen nuk kanë munguar reagimet nga shteti grek. Ministria e Jashtme kërkon zbulimin dhe nxjerrjen para drejtësisë të autorëve. “Ministria greke e Punëve të Jashtme shpreh keqardhjen dhe shqetësimin e saj për shpërthimin e monumentit dhe e dënon fuqishëm. Ngjarja sfidon minoritetin kombëtar grek dhe në fund të fundit marrëdhëniet grekoshqiptare. Duhet të hetohen menjëherë dhe autorët të vendosen para drejtësisë. Presim që pala shqiptare të veprojë sa më shpejt që të jetë e mundur, duke rikthyer ndjenjën e sigurisë së pakicës kombëtare greke. Ministria e Punëve të Jashtme dhe Ambasada Greke, si dhe autoritetet konsullore në Shqipëri po ndjekin nga afër këtë rast”, thuhet në reagim. Memoriali i Thimio Lolit ra pre e vandalistëve edhe në fund të vitit 2018. Këto dy ngjarje lidhen me denoncimet e fundit ku Loli evidentohet si autor i disa krimeve ndaj shqiptarëve pas shpalljes së Pavarësisë dhe gjatë Luftës së Dytë Botërore. Loli ka qenë një prej mbështetësve të idesë për shkëputjen e territorit të ashtuquajtur Epiri i Veriut për t’u bashkuar me Greqinë. Por, nga banorët minoritarë të Kranesë në Delvinë Loli njihet si “hero”. Në vitin 1914, ai udhëhoqi kryengritjen për Epirin e Veriut në Sarandë, ndërsa në vitin 1944 kundër çamëve në Greqi. Memoriali i tij është vendosur në qendër të fshatit Krane dhe çdo vit aty kryhen ceremoni përkujtimore nga qarqe nacionaliste greke. sh. d