Po shiste hashash te rruga "Myslym Shyri", pranga 29- vjeçarit
Një 29- vjeçar është arrestuar nga Antidroga e Tiranës, pasi dyshohet se shpërndante hashash në zona të ndryshme të kryeqytetit. Burimet thanë se atij i janë sekuestruar 1.1 kg kanabis sativa dhe 6 celularë. Ai po hetohej prej disa muajsh nga oficerët e Policisë, madje gjatë kësaj periudhe është mbajtur në vëzhgim, është filmuar dhe fotografuar duke shitur lëndë narkotike. Burimet thanë se gjatë periudhës që mbahej nën vëzhgim, janë zbuluar edhe persona të tjerë që blinin hashash te 29vjeçari. "Në vijim të punës për parandalimin dhe ndëshkimin e veprimtarisë kriminale në fushën e narkotikëve, Seksioni i Narkotikëve pas një pune hetimore disamujore nën drejtimin e Prokurorisë së Tiranë, në kuadër të procedimit të vitit 2019, ndjekur me metoda speciale te hetimit, finalizoi me sukses operacionin policor të koduar ' Distributori', duke arrestuar në flagrancë shtetasin E. M., 29 vjeç, banues në Tiranë", tha zyrtarisht Policia. Pas dokumentimit të këtij aktiviteti kriminal, Gjykata e Tiranës ka vendosur masën e sigurisë "Arrest në burg" për shtetasin E. M. Menjëherë nga Seksioni për Hetimin e Narkotikëve është organizuar puna për ekzekutimin e vendimit të Gjykatës dhe kapjen e tij në flagrancë, e cila u realizua gjatë mbrëmjes së të hënës në rrugën "Myslym Shyri", ku ky shtetas ishte duke tregtuar lëndë narkotike. Gjatë kontrollit në ambientet e përdorura nga ky shtetas, Policia gjeti tri qese me lëndë narkotike kanabis sativa, të ndara në doza dhe të futura në qese farmaceutike, të gatshme për treg. Seksioni Për Hetimin e Narkotikëve, gjatë kohës së ndjekjes me metoda speciale të hetimit, ka bërë të mundur dokumentimin me prova ligjore ( foto, video dhe raporte vëzhgimi) të aktivitetit kriminal të shitjes së lëndës narkotike nga ky shtetas, duke realizuar edhe kapjen e disa personave që blinin te shtetasi E. M.. Gjithashtu, në kuadër të operacionit u procedua në gjendje të lirë shtetasi L. I., 23 vjeç, banues në Tiranë, për veprën penale "Prodhimi dhe shitja e narkotikëve".