NISIN APLIKIMET
Pensionet me KEMP, si përfitohet nga ligji i ri
Zbardhen ndryshimet në ligjin e ri për aftësinë e k ufizuar. Procedurat e reja për të përfituar pagesën e rastet kur mund të merret edhe “pensioni” e paga mujore
Pagesat për personat me aftësi të kufizuara do të bëhen menjëherë nga Qeveria, pa qenë nevoja të kalojnë përmes këshillave bashkiakë.
Praktika e deritanishme ka bërë që të krijohen vonesa ditore deri edhe javore për marrjen e pagesës, gjë e cila ka sjellë pakënaqësi në radhët e personave me aftësi të kufizuara dhe familjarëve të tyre.
NDRYSHIMET Në ligjin e ri "Për asistencën sociale" është vënë dorë mbi procedurat për marrjen e KEMP- it, duke bërë të mundur thjeshtimin e tyre. Kështu, pagesat, duke qenë se nuk do të kalojnë përmes vendimmarrjes së pushtetit vendor, do të mund të tërhiqen çdo muaj, pa u përsëritur përvoja e viteve të mëparshme. Sipas Ministrisë së Shëndetësisë, janë rreth 165 mijë persona pjesë e skemës, që përfitojnë nga këto lehtësi. Nga ana tjetër, edhe për lidhjen e KEMP- it janë bërë përmirësime. Me rregullat e reja, për të përfituar pagesën mujore, personat me aftësi të kufizuara nuk do të duhet më t'i drejtohen KMCAP- ve( Komisioni Mjekësor i Caktimit të Aftësisë për Punë, pasi vendimi do të merret bazuar në dokumentacionin e dosjes së dërguar nga mjeku. Pra, ' filtri' i vetëm do të jenë mjekët specialistë, të cilët do të përcaktojnë edhe diagnozën. Mbi bazën e dokumentacionit që këta të fundit do të dorëzojnë, anëtarët e KMCAP- it do të gjykojnë nëse plotësohen ose jo kushtet ligjore, do të vendosin grupin e përfitimit, pra nëse i sëmuri ka nevojë për përkujdesje apo jo, si edhe afatet e përfitimit. Sa u takon afateve për daljen në komision, në rastin e personave me aftësi të kufizuara dhe të verbërve, koha e rivlerësimit do të jetë 1, 3, 5 vjet dhe përgjithmonë.
MANASTIRLIU Me ndryshimet e miratuara rishtazi është ndryshuar edhe koha e pagesës. Më parë, ata persona që KMCAP i shpall të aftë për të punuar, koha e përfitimit të KEMP- it ishte vetëm 48 muaj me qëllim riintegrimin e tyre në tregun e punës dhe shkëputjen nga skema e mbështetjes financiare. Por sipas ministres së Shëndetësisë, Ogerta Manastirliu, tashmë ky kufizim është hequr. Këta persona mund të punojnë dhe njëkohësisht do marrin edhe pagesën për aftësinë e kufizuar. "Përveç pagës si të punësuar, personat me aftësi ndryshe do të përfitojnë edhe paketën e plotë të mbrojtjes sociale që u sigurohet nga shteti, përfshirë edhe pagesën e aftësisë së kufizuar, gjatë gjithë kohës, pavarësisht se janë në punë. Hiqet limiti 48- mujor i pagesës së aftësisë së kufizuar për personat e punësuar, duke nxitur punësimin dhe integrimin e kësaj kategorie përmes punësimit, pasi ata do ta përfitojnë paketën e plotë të mbrojtjes sociale gjatë gjithë kohës", tha Manastirliu dje, taksa vizitoi një të punësuar me karrige me rrota në sektorin e shërbimit të ADISA në Tiranë. Ligji i ri i asistencës sociale parashikon po ashtu përcaktimin e të drejtës së përfitimit të pagesave të personave me aftësi të kufizuar dhe të së drejtës së përfitimit të një ndihmësi personal, duke zgjeruar gamën e përfituesve dhe duke përfshirë në skemë rreth 4000 persona, të cilët më parë nuk mund të përfitonin nga skema e sigurimeve shoqërore, për shkak se nuk plotësonin kushtin e të pasurit 12 muaj kontribute në skemën e sigurimeve shoqërore në 5 vitet e fundit.