Rama mbledh Asamblenë e PS- së për të shkarkuar Bushatin: S’ka pakt për të ndenjurat e politikanëve
PRAPASKENAT E ASAMBLESE SE PS, IKIN DITMIR BUSHATI, BLERINA GJYLAMETI E LINDITA NIKOLLA NGA DREJTIMI I QARQEVE
Në mbledhjen e djeshme të Asamblesë së Partisë Socialiste, kreu i PS- së, Edi Rama, theksoi se kërkon paqe politike me Partinë Demokratike.
Në një fjalim të gjatë, i cili zuri edhe gjithë kohën e mbledhjes së Asamblesë, Kryeministri Rama foli edhe për procesin zgjedhor të 30 qershorit si edhe për zgjedhjet e brendshme në parti. Për një marrëveshje të mundshme me PD- në, Kryeministri theksoi se është i gatshëm të ulet të dialogojë me opozitën, por duke vendosur kusht moscenimin e Reformës në Drejtësi. Krahas kësaj, ai u tregua diskret me të gjithë të zgjedhurit në njësitë e qeverisjes vendore për sa u përket lëvizjeve në administratë, duke i vendosur limitet për shkarkime në administratë. Krahas kësaj, kreu i qeverisë u ndal edhe te puna që duhet të bëjnë socialistët për të qenë pjesë e projektit të tij për vitin 2021. Në mënyrë figurative, Rama theksoi se të gjithë duhet të bëjnë kilometrat e tyre, duke lëshuar edhe akuza për disa nga drejtuesit e PS- së, që dolën në fushatë elektorale vetëm 1 javë përpara zgjedhjeve të 30 qershorit. Ai theksoi se kushdo që nuk arrin objektivat, qoftë kryebashkiak, deputet etj., nuk do të përfshihet në projektin e 2021, duke i kërcënuar me largime nga partia. Për sa u përket zgjedhjeve të 30 qershorit, Rama theksoi se ato u zhvilluan nën mbështetjen e Shteteve të Bashkuara të Amerikës dhe Bashkimit Europian.
SHBA DHE BE GARANTUAN 30 QERSHORIN Në 30 qershor fitoi shteti, fitoi qytetaria, fitoi shpresa, humbi antishteti, humbi rrëmuja, humbi dhe balta. 30 qershori, që deri para pak kohe dukej sikur nuk do vinte kurrë, iku paqësisht, por plaga është ende e hapur dhe më e hapur se asnjëherë është dhe sfida jonë, sepse, që të jemi të qartë, 30 qershorin e fituan qytetarët edhe për ne, ndërsa gjithçka vjen pas 30 qershorit, duhet ta fitojmë ne për qytetarët. Është me vend këtu ta përsëris se Shqipëria u shfaq në të gjithë brishtësinë e saj dhe u kërcënua, u godit, u lëkund, por, nëse nuk u rrëzua, kjo patjetër që erdhi edhe falë qëndrimit të SHBA dhe BE në krah të shqiptarëve, në mbrojtje të parimeve më themelore të demokracisë, në mbështetje të lirisë së zgjedhjeve dhe të së drejtës së çdo qytetari për të zgjedhur. Kështu që, mendoj se asnjëherë, kur të flitet për këtë moment kompleks në jetën tonë politike e shoqërore, nuk do të harrohet roli i aleatëve tanë, për të cilët nuk do të jetë kurrë mjaft falënderimi për gjithçka ata bënë.
ZGJEDHJET BRENDA PS- SË Partia Socialiste do të hyjë në zgjedhjet e veta të brendshme nga shtatori në çdo organizatë dhe deri në janarin e ardhshëm në Kongres. Unë dua të ndaj me ju bindjen se objektivi ynë për këto zgjedhje të brendshme duhet të jetë realizimi i procesit më të thellë të komunikimit të organizimit dhe të hapjes së PS, që kemi realizuar ndonjëherë në periudhat e mëparshme në zgjedhjet tona të brendshme. Kjo kërkon që i gjithë lidershipi i partisë, nga unë i pari, kryesia dhe grupi i deputetëve, por edhe e gjithë skuadra e qeverisë, ministra e zv/ ministra, së bashku me kryetarët e bashkive dhe anëtarët e kësaj Asambleje, si dhe të gjithë të zgjedhurit në këshillat bashkiakë, të zbresin në tokë në kuptimin e plotë të fjalës, në mënyrë që çdo organizatë socialiste, ndër 5500 që janë në të gjithë territorin, të ketë mundësinë e komunikimit të drejtpërdrejtë me ne, në mënyrë që në çdonjërën nga 300 njësitë administrative të vendit të krijohet mundësia e komunikimit të drejtpërdrejtë të njerëzve me ne. Debat në çdo organizatë me anëtarët e partisë. Debat me simpatizantët dhe me çdo qytetar që dëshiron të marrë pjesë në bashkëbisedim, pavarësisht bindjeve të veta dhe përkatësisë së vet, debat në çdo lagje, në çdo fshat, në çdo njësi administrative dhe bashki.
KËRCËNIME PËR LARGIME NGA PS Kushdo, nën çatinë e kësaj shtëpie të madhe socialistësh dhe progresistësh që mund të ketë hesape me drejtësinë, hesapet i ka individuale dhe duhet t’i trajtojë individualisht. Ne e kemi treguar, por besoj që është mirë ta ripërsërisim që partia jonë nuk ka gatishmëri të mbrojë, të justifikojë, të tolerojë askënd që mund të ketë hesape me drejtësinë. Është koha që secili dhe secila në këtë sallë të bëjë kilometrat e vet. Dua ta them që sot, nuk mund të ketë më deputetë që marrin malet për të takuar njerëz, deputetë që marrin njerëzit në krahë për t’iu zgjidhur një hall, deputetë që rrinë në kontakt të vazhdueshëm me njerëzit dhe nga ana tjetër deputetë që edhe në fushatën e 30 qershorit kanë shkuar te njerëzit vetëm javën e fundit. Nuk mund të ketë më! Nuk mund të ketë më anëtarë të Asamblesë Kombëtare të PS, që kujtohen për PS vetëm nga ftesa për mbledhjen e Asamblesë apo që pavarësisht se mund të jenë të rregullt nëpër mbledhje, nuk shfaqen te njerëzit. Kush nuk do t’i përgjigjet ritmit që kërkon 30 qershori, nuk do jetë më në projektin tonë politik të vitit 2021. Kush nuk do bëjë kilometrat e veta që i imponon 30 qershori, do dalë nga projekti ynë politik i vitit 2021! Ashtu sikundër, dua ta them që sot, sepse është gjëja e fundit që dëshiroj që të ndodhë, do të dalë jashtë nga kjo familje e madhe politike çdo kryebashkiak që do bëjë gabimin të mendojë se tani që ka marrë mandatin, mund të bëjë pa njerëzit dhe mund të bëjë edhe pa ne. NDRYSHIMET NË ADMINISTRATËN VENDORE Dua ta them shumë qartë, që, kush ka qenë thjesht një viktimë e presionit për të ardhur në bulevard, nuk duhet të preket dhe nuk ka pse të preket për këtë arsye në të drejtën e tij që të vazhdojë punën në administratat apo në ndërmarrjet bashkiake të bashkive, që nuk i fituam me kundërshtarë, por që 30 qershori na i ka lënë si barrë për të treguar kush jemi. E kam thënë shumë herë në fushatë dhe do dëshiroja ta dëgjonin shumë mirë në radhë të parë kryetarët e bashkive që janë këtu: asnjë grua, asnjë vajzë, në radhë të parë, nuk do të largohet nga puna, në asnjë nga bashkitë e djathta, që nuk janë më në duart e kryebashkiakëve të djathtë. E thashë edhe më parë, larg qoftë, mund të dalë dikush dhe të bëjë të kundërtën, por, për sa na takon, ne do bëjmë çmos që asnjë revansh politik në administratë të mos tolerohet dhe asnjë lloj hyrjeje triumfaliste e stilit feudal, me të cilën politika shqiptare ka bashkudhëtuar për shumë kohë, hyrje prej ushtrie fitimtare partiake në kërkim të zbrazjes së vendeve të punës nga ata që janë aty dhe të mbushjes së vendeve të punës me ata që vijnë pa asnjë kriter dhe karar, nuk do të lejohet. Pa diskutim që janë kryetarët e bashkisë ata që kanë të drejtën të bëjnë të gjitha propozimet, patjetër, por absolutisht nuk do t’ua njohim të drejtën që ta kthejnë bashkinë nga një klientelë e djathtë në një klientelë gjoja të majtë. Nga një klientelë njerëzish të keqpërdorur për t’i sjellë nëpër mitingje, në një klientelë njerëzish për qoka dhe arsye vetjake.
MARRËVESHJE ME PD- NË Patjetër që ne duam paqe politike, por një paqe politike për Shqipërinë, që duhet të nisë me Shqipërinë, jo me karriget e duhet të bitiset për Shqipërinë, jo për karriget, kështu që dora ime mbetet e shtrirë, gati për të shkruar prapë kur të vijë momenti. Reforma Zgjedhore, sipas rekomandimeve të OSBE/ ODIHR dhe porosisë së Këshillit Europian, mbetet një sfidë e përbashkët, patjetër, me opozitën parlamentare dhe me opozitën joparlamentare, e cila ka dhe një vend të lirë bosh që e pret në komisionin e reformës, është e mirëpritur të ulet, madje, ka dhe veto. Ky është ndryshimi midis nesh dhe tyre. Ata me molotov, ne u japim edhe veton që të na vënë veton ne dhe jemi shumë krenarë që ndryshojmë në këtë pikë. Ndërsa Reforma në Drejtësi, as nuk negociohet, as nuk diskutohet, vetëm mbështetet dhe duhet të jetë shumë e qartë, që unë personalisht e di që ka shkolla të ndryshme mendimi në lidershipin e Partisë Socialiste, nuk kam disponim minimal për asnjë lloj marrëveshjeje politike për të ndenjurat e politikanëve dhe për asnjë lloj marrëveshjeje politike që rrezikon ose mund të rrezikojë potencialisht, të pengojë drejtësinë të merret me këdo që mund të jetë subjekt i drejtësisë, qoftë djathtas, qoftë majtas, qoftë në mes, qoftë lartë, qoftë poshtë, qoftë këtu brenda, qoftë jashtë kësaj salle.
Patjetër që ne duam paqe politike, por një paqe politike për Shqipërinë, që duhet të nisë me Shqipërinë, jo me karriget e duhet të bitiset për Shqipërinë, jo për karriget, kështu që dora ime mbetet e shtrirë, gati për të shkruar prapë kur të vijë momenti. Reforma Zgjedhore, sipas rekomandimeve të OSBE/ ODIHR dhe porosisë së Këshillit Europian, mbetet një sfidë e përbashkët, patjetër, me opozitën parlamentare dhe me opozitën joparlamentare, e cila ka dhe një vend të lirë bosh që e pret në komisionin e reformës, është e mirëpritur të ulet, madje, ka dhe veto. Ky është ndryshimi midis nesh dhe tyre