“E motivuar politikisht”, qeveria humb gjyqin me Becchettin, do paguajmë 110 milionë euro
“ZERI I AMERIKES” KONFIRMON SHIFREN E FRIKSHME. AVOKATURA E APELON
Investitorët pohuan se masat ishin pjesë e një fushate shtetërore të ngacmimit, të motivuar pjesërisht nga kritikat që stacioni televiziv i tyre, ‘ Agonset’ kishte bërë për administratat e njëpasnjëshme shqiptare
Është e konfirmuar. Qeveria, për shkak të sjelljes politike, do të duhet të paguajë 110 milionë euro plus edhe interesat, për dëmin e shkaktuar nga mbyllja e aktivitetit të televizionit “Agon”. Lajmi është konfirmuar dje nga “Zëri i Amerikës”.
Pak kohë më parë, kreu i qeverisë Rama nuk pranoi të përgjigjej publikisht nëse ishte humbur gjyqi, duke theksuar se kishte një pakt konfidencialiteti mes palëve. Në fakt, gjyqi ishte humbur që më datë 24 prill dhe qeverisë i ka ngelur dëshpërimisht vetëm një akt apelimi, që, sipas juristëve të gjyqeve ndërkombëtare të arbitrazhit, është shumë i rrallë. Ja çfarë shkruan “Zëri i Amerikës” për rastin në fjalë.
SHQIPËRIA DO KUNDËRSHTOJË VENDIMIN NË FAVOR TË BECCHETTI- T
Autoritetet shqiptare kanë afat deri më 20 gusht për të kundërshtuar vendimin e marrë nga Qendra Ndërkombëtare për Zgjidhjen e Mosmarrëveshjeve të Investimeve ( ICSID), një Gjykatë Arbitrazhi, pjesë e Bankës Botërore, në favor të sipërmarrësit italian Francesco Becchetti dhe disa kompanive dhe ortakëve të tij, nënës së tij Liliana Condomitti dhe bashkëpunëtorëve Mauro de Renzis dhe Stefania Grigolon, për mbylljen e televizionit “Agon” pak vite më parë. ICSID dënoi Shqipërinë me 110 milionë euro, duke gjykuar se mbyllja e televizionit ishte e “motivuar politikisht”. Vendimi u mor në 24 prill. DY muaj më vonë, Avokatura e Shtetit njoftoi “fillimin e procedurës së konkurrimit për përzgjedhjen dhe kontraktimin e avokatit ose të zyrës së avokatisë vendase ose të huaj..” me qëllim “përfaqësimi dhe mbrojtja e interesave të Republikës së Shqipërisë, në kuadër të procesit të anulimit të një vendimi arbitrazhi në ICSID”.
Anulimi është një formë e jashtëzakonshme rekursi e parashikuar në mbrojtje të parimeve themelore juridike që lidhen më një proces. Një palë mund të kërkojë anulimin e plotë ose të pjesshëm të një vendimi, duke u mbështetur së paku në një prej 5 rasteve të parashikuara nga vetë rregullat e ICSID- së: kur trupa gjykuese nuk është formuar në mënyrë korrekte; kur ajo ka tejkaluar hapur pushtetin e saj; kur është konstatuar rast korrupsioni nga një prej anëtarëve; kur është vënë re devijimi nga një prej rregullave bazë të procedurave dhe kur vendimi nuk ka mundur të dëshmojë motivet, mbi të cilat është bazuar.
Nuk dihet se në cilën nga këto klauzola do të mbështetet pala shqiptare në kundërshtimin e vendimit, i cili përfaqëson vlerën më të lartë, me të cilën Shqipëria është dënuar nga një Gjykatë Arbitrazhi.
KONFIRMIMI
Dje ishte një ndër mediat prestigjioze, “Lexology”, e cila konfirmoi humbjen e gjyqit nga Shqipëria. “Investitorët kishin pretenduar një shumë prej 650 milionë eurosh si dëmshpërblim ndaj një sërë masash që synonin investimet e tyre në sektorët e medias së vendit, sektorin e energjisë hidroelektrike dhe të mbeturinave, duke përfshirë ngrirjen e aseteve, auditimet tatimore dhe procedurat penale. Investitorët pohuan se masat ishin pjesë e një fushate shtetërore të ngacmimit, të motivuar pjesërisht nga kritikat që stacioni televiziv i tyre, ‘ Agonset’ kishte bërë për administratat e njëpasnjëshme shqiptare. Kryeministri aktual i shtetit, Edi Rama, njoftoi në 2015 se “ne kemi shpallur një luftë” kundër pronarëve të ‘ Agonset’. Stacioni televiziv më vonë u largua, pasi pajisjet e tij u sekuestruan nga qeveria”, thuhet në shkrimin e “Lexology”.