Meta kërkon ndërmjetësimin e Greminger të OSBE për krizën
“Është në interes të kredibilitetit të OSBE të angazhohet për tejkalimin e krizës në Shqipëri sa më parë të jetë e mundur”
Presidenti Ilir Meta kërkoi dje ndërmjetësimin e OSBE- së për tejkalimin e krizës politike në vend.
Ditën e djeshme, kreu i shtetit priti në një takim sekretarin e përgjithshëm të OSBEsë, Thomas Greminger, ku e falënderoi për mbështetjen e dhënë nga sekretariati dhe nga vetë sekretari i përgjithshëm për përgatitjet që Shqipëria po bën në funksion të marrjes së kryesisë së radhës së OSBE- së në vitin 2020. “Kjo është sipërmarrje madhore, që kërkon angazhimin dhe bashkëpunimin e të gjithë faktorëve politikë dhe institucionalë në vend”, theksoi Presidenti Meta.
KRIZA POLITIKE
Sipas njoftimit të media të bërë publik nga zyra e shtypit e Presidencës, Meta e informoi zyrtarin e OSBE- së për thellimin e krizës së gjithanshme politike dhe institucionale që po kalon vendi, duke i kërkuar ndërmjetësimin sa më parë të jetë e mundur midis palëve politike në vend për zgjidhjen e kësaj krize. “OSBE ka një rëndësi të posaçme për sigurinë euroatlantike dhe për Shqipërinë në veçanti. Është organizata e parë shumëpalëshe, në të cilën Shqipëria aderoi pas rënies së komunizmit dhe që ka dhënë mbështetje të vazhdueshme për forcimin e demokracisë dhe shtetit ligjor në vendin tonë. Për rivendosjen e funksionimit normal të institucioneve demokratike dhe shmangien e përshkallëzimit të mëtejshëm të situatës mjaft kritike ku ndodhet vendi, është në interes të kredibilitetit të OSBE- së të angazhohet për tejkalimin e krizës së rëndë në Shqipëri sa më parë të jetë e mundur. Ky angazhim do të shërbejë si mundësi tepër e rëndësishme për rikthimin e vendit në shinat e demokracisë dhe sundimit të ligjit, por dhe konsolidimit të lidershipit të Shqipërisë si faktor stabiliteti në rajon, gjatë marrjes së kryesisë së radhës së OSBE- së, por edhe së ardhmes europiane të Shqipërisë, për më tepër kur presim që në 17- 18 tetor Këshilli i Bashkimit Europian të vendosë për çeljen e negociatave të anëtarësimit”, theksoi Presidenti Meta.
Gjatë takimit, kreu i shtetit i tregoi sekretarit të përgjithshëm të OSBE- së përpjekjet që ai kishte ndërmarrë për tejkalimin e krizës politike që ka kapur vendin prej më shumë se 6 muajsh. Sipas tij, dialogu politik gjithëpërfshirës dhe i sinqertë mund të shërbejë për tejkalimin e kësaj situate. “Pavarësisht përpjekjeve të vazhdueshme dhe konkrete që kam ndërmarrë deri tani për parandalimin e kësaj situate, përpjekje që janë minuar nga aktorë të ndryshëm, jam edhe më i bindur tani se rruga e vetme është dialogu politik gjithëpërfshirës dhe i sinqertë, që i jep zgjidhje të plotë e përfundimtare kësaj krize”, ka nënvizuar Presidenti gjatë takimit. Kreu i shtetit prej disa muajsh u ka bërë apel palëve për nisjen e dialogut për kapërcimin e krizës, gjë e cila deri më tani nuk ka ndodhur, pasi palët janë polarizuar edhe më shumë pas zhvillimit të zgjedhjeve të 30 qershorit.