Banesat sociale me qira, sa do paguajnë përfituesit
“Qiraja vjetore, jo më e lartë se 3% e kostos së ndërtimit të apartamentit”
Banorët që përfitojnë strehë sociale nga programet e pushtetit qendror a vendor, nuk do të paguajnë më shumë se 3 për qind të shumës që ka paguar qeveria ose bashkia për ta blerë a ndërtuar atë.
Ky është tavani që ka caktuar Këshilli i Ministrave në vendimin mbi mënyrën e llogaritjes së qirasë së banesave sociale, që financohen nga buxheti i shtetit ose bashkitë. Ndonëse shuma varion bazuar në zonën a tipologjinë e ndërtimit, asnjëherë qiraja sociale nuk mund të jetë më e lartë se shuma e poshtëshënuar. “Masa e qirasë, e shprehur në lek/ m2, llogaritet në varësi të kostos së ndërtimit ose të vlerës së blerjes së banesës në treg. Masa vjetore e qirasë nuk mund të jetë më e madhe se 3% e kostos së ndërtimit ose e vlerës së banesës së blerë në treg”. Bëhet fjalë për apartamente me qira që ka çdo njësi e pushtetit vendor posaçërisht për kategori familjesh që nuk do të përballonin dot qiranë në tregun e lirë; banesa që mund të jenë blerë për këtë qëllim apo objekte në pronësi shtetërore të dala jashtë funksionit dhe që transformohen në banesa të përdorshme për familjet në nevojë.
PËRLLOGARITJA Për fondin e apartamenteve gjendje, mënyra e llogaritjes së qirasë është krejt e thjeshtë. Përllogaritja vështirësohet te banesat e reja që ndërtohen me qëllim strehimin e banorëve. Sipas qeverisë, në këtë rast duhen marrë në konsideratë të gjitha shpenzimet që i janë dashur për të ndërtuar objektin, që nga lirimi i ambienteve, projekti teknik, mbikëqyrja e punimeve e deri te kolaudimi dhe tarifa e regjistrimit të pronës në Agjencinë Shtetërore të Kadastrës. Nuk do të jenë pjesë e vlerës totale vetëm trualli ( kur është në pronësi të njësisë së vetëqeverisjes vendore), rrjeti i ujësjellës kanalizimeve, që po ashtu varet nga bashkitë dhe taksat e tarifat që do të shkonin po në xhepin e bashkisë. Sakaq, për objektet jashtë funksionit që përshtaten si banesa sociale, përllogaritet kostoja e ndërhyrjes, vlera kapitale e objektit dhe çdo shpenzim tjetër që e bën apartamentin të banueshëm. Çështja thjeshtohet te banesat e blera në treg, ku masa e qirasë derivon në bazë të kostos së saj, taksat e tarifat e aplikueshme, kostoja për regjistrimin e pronës dhe çdo shpenzim tjetër. Por, qeveria ka vendosur që me lëvizjen e çmimeve të tregut, të ndryshojë çdo vit edhe masën e qirasë. “Për çdo objekt të ri që ndërtohet, adaptohet ose blihet në treg, masa e qirasë llogaritet vetëm një herë dhe miratohet me vendim të këshillit të njësisë së vetëqeverisjes vendore. Ky nivel qiraje përdoret deri në fund të muajit janar të vitit pasardhës. Çdo vit, niveli i qirasë së miratuar nga këshilli i njësisë së vetëqeverisjes vendore shumëzohet me indeksin e ndryshimit të çmimeve të konsumit dhe miratohet nga këshilli i njësisë së vetëqeverisjes vendore”, nënvizohet në vendim. Të ardhurat e mbledhura nga banesat sociale mblidhen në një fond të veçantë për llogari të bashkisë, e cila është përgjegjëse për menaxhimin e tyre.