Përplasjet për shembjen e Teatrit, Veliaj: Do bëhet!
"Tiranën s'mund ta mbajë peng një minorancë histerike"
Ashtu si kreu i qeverisë, edhe i pari i Tiranës, Erion Veliaj, mendon se "të paktët" që kundërshtojnë ndërtimin e një teatri të ri, nuk do të arrijnë të mbajnë peng zhvillimin e qytetit. Nga Denveri i Shteteve të Bashkuara të Amerikës, pjesëmarrës në një konferencë mbi ambientin, kryebashkiaku Veliaj është prononcuar mbi zhurmën e madhe që po bëhet në kryeqytet dy ditët e fundit për Teatrin. "Betejat" e atyre që nuk e duan shembjen, për kryetarin janë ogur i mirë, ashtu si çdo punë tjetër e tij e kontestuar fort dhe në fund e vlerësuar me çmime ndërkombëtare. Ashtu si projektet e mëparshme, edhe Teatri është domosdoshmëri, të cilën ka marrë përsipër ta realizojë me çdo kusht. "Kemi kaluar disa sfida në mandatin tonë të parë: mbaj mend këndet e lodrave, protestat kundër tyre. Edhe këtu në Amerikë, shumë prej projekteve që sjellin ndryshim, përshkohen nga një sens histerie, protestash apo pakënaqësie. Megjithatë, kur ndryshimi vjen, përqafohet nga të gjithë. Në Tiranë, ndryshimi do të vijë edhe për çështje shumë të debatueshme, si zgjatimi i Lanës, Unaza e Madhe, Teatri i Ri Kombëtar, por janë ndryshime absolutisht të nevojshme dhe të pakontestueshme. Pra, nuk mundet që qyteti të mbahet peng prej disa minorancave që do ekzistojnë gjithmonë dhe gjithmonë nuk do të bien dakord. Më vjen mirë se si Tirana, në aktivitetin më të madh të bashkive në SHBA, është sot imazhi i një Shqipërie moderne, i një Shqipërie që po ndryshon, që ka plot probleme, por që më e mira është përpara". Çështja e Teatrit Kombëtar ka ndarë opinionin publik dhe vetë artistët. Në kulmin e përplasjeve për shembjen e teatrit aktual për të ndërtuar të riun, kryetari i bashkisë udhëtoi për në Denver të Shteteve të Bashkuara të Amerikës, ku mori në konferencën vjetore me temë "Qytete që rriten me gjelbërim", në të cilën prezantoi Tiranën përpara përfaqësuesve të 1 mijë kryeqyteteve amerikane e kanadeze. Plani Vendor për Tiranën 2030, transformimi i sheshit "Skënderbej" dhe fokusi tek investimet urbane për krijimin e "Pyllit Orbital" përreth qytetit, kanë tërhequr vëmendjen e drejtuesve të qyteteve të tjera dhe të urbanistëve.