Kandidati për SPAK para KPK, del me deklarim të saktë të pasurisë
Komisioni i Pavarur i Kualifikimit zhvilloi dje seancën dëgjimore me prokurorin e Krimeve të Rënda, Klodian Braho, i cili njëkohësisht është dhe një nga kandidatët për Prokurorinë Speciale Antikorrupsion. Trupa që bëri vetingun e Brahos përbëhej nga Xhensila Pine, Valbona Sanxhaktari dhe Roland Ilia. Sipas raportit të ILDKPI- së, prokurori Braho ka bërë një deklarim të saktë të pasurisë, nuk ka fshehje të ardhurash apo deklarim të rreme. Prokurori që po i nënshtrohet vetingut, ka një apartament 66.8 m2 blerë 29 mijë euro në vitin 2008 dhe burimi i të ardhurave për blerjen e tij është një hua nga babai dhe një kredi. Gjithashtu, ai disponon një automjet në vlerën 400 mijë lekë. Në lidhje me vlerësimin e figurës, DSIK konstaton përshtatshmërinë për vijimin e detyrës për prokurorin e Krimeve të Rënda, Klodian Braho. Gjatë seancës u theksua se për Brahon nuk ka asnjë masë disiplinore gjatë ushtrimit të detyrës dhe asnjë problematike në çështjet e zgjedhura me short. Klodian Braho ka mbaruar Shkollën e Magjistraturës në vitet 2005- 2008 dhe më pas është emëruar prokuror në Berat. Në vitin 2012, Braho u transferua në Prokurorinë e Vlorës ku mbajti edhe postin e zv. drejtuesit, ndërsa në vitin 2015 u emërua në Prokurorinë e Krimeve të Rënda. Braho gjithashtu është i angazhuar edhe në mësimdhënie, por edhe si ekspert në Shkollën e Magjistraturës. Ai u kualifikua nga Këshilli i Lartë i Prokurorisë mes kandidatëve për SPAK, por për t'u emëruar nevojitet vendimi i formës së prerë nga institucionet e vetingut. Procesi i vetingut është hapi i fundit për prokurorin e Krimeve të Rënda, Klodian Braho, në mënyrë që të sigurojë një vend në Prokurorinë e Posaçme kundër Korrupsionit dhe Krimit të Organizuar, e njohur si SPAK. Analiza e pasurisë është një ndër tri shtyllat e rivlerësimit për prokurorët, së bashku me kontrollin e figurës dhe vlerësimin e aftësive profesionale.