Refuzonin kontrollet, në hetim tre inspektorët e Bashkisë Bulqizë

BULQIZE - Tre punonjës në Bashkinë e Bulqizës janë proceduar penalisht me akuzën e shpërdorimit të detyrës. Mësohet se është proceduar penalisht B. Ç., 25 vjeç, kryeinspektor i Inspektoratit të Mbrojtjes së Territorit, dhe dy inspektorët A. T., 42 vjeç, dhe E. A., 24 vjeç. Të tre këta punonjës të bashkisë nuk kanë kryer me dashje marrjen e masave ligjore për prishjen e ndërtimeve të kundërligjshme ndaj subjekteve që kanë zaptuar hapësirat publike. Mbi ta rëndon akuza për veprën penale “Shpërdorim detyre”, kryer në bashkëpunim. “Nga Specialistët e Seksionit për Hetimin e Krimit Ekonomik e Financiar në Drejtorinë Vendore të Policisë Dibër, në kuadër të masave të marra kundër informalitetit, kanë ushtruar kontrolle në zonën e Bulqizës për subjektet që kanë zaptuar hapësirat publike. Si rezultat, u proceduan penalisht tre inspektorë të Inspektoratit të Mbrojtjes së Territorit, Bashkia Bulqizë. B. Ç., 25 vjeç, banues në Bulqizë, me detyrë kryeinspektor i IMT, Bashkia Bulqizë; A. T., 42 vjeç, banues në Bulqizë, me detyrë inspektor në IMT, Bashkia Bulqizë; E. A., 24 vjeç, banues në Bulqizë, me detyrë inspektor në IMT, Bashkia Bulqizë. Këta shtetas, në neglizhencë të kryerjes së detyrave si punonjës shtetërorë, nuk kanë kryer me dashje marrjen e masave ligjore për prishjen e ndërtimeve të kundërligjshme ndaj subjekteve që kanë zaptuar hapësirat publike të Bashkisë Bulqizë. Materialet i kaluan Prokurorisë pranë Gjykatës së Shkallës së Parë Dibër, për veprën penale ‘ Shpërdorim detyre’ kryer në bashkëpunim”, bëhet e ditur nga Policia. Ndërkohë, po në kuadër të këtij operacioni kundër informalitetit, janë proceduar në gjendje të lirë edhe tre persona të tjerë në Mat për prerje të paligjshme të pyjeve, ku dhe janë sekuestruar 18 metra kub dru. Janë proceduar S. V., 48 vjeç, banues në Dibër ( pronar i një subjekti për shfrytëzim pyjesh); B. L., 47 vjeç, banues në Tiranë dhe M. D., 60 vjeç, banues në Tiranë. 48vjeçari po drejtonte një kamion të ngarkuar me 8 metra kub lëndë drusore, i cili nuk dispononte doku- mentacion për transport të lëndës drusore, faturë shoqërimi të mallit, si dhe nuk kishte faturë të rregullt për prerjen e pyjeve. Nga hetimet e kryera ka rezultuar se S. L. ishte i punësuar në mënyrë të paligjshme në subjektin me pronar S. V., i cili do të hetohet në gjendje të lirë për veprat penale “Punësim i paligjshëm” dhe “Fshehja e të ardhurave”. Për të njëjtën vepër penale është proceduar edhe M. D..