Vendimi për pensionet, si përfitohet shtesa 4300 lekë
Qeveria përcakton afatet dhe dokumentet që duhen për dy kategoritë e pensionistëve që marrin shtesën nga 9 deri në 20 për qind. Kush përfiton nga vendimi i ri
Për të gjithë ata punonjës që ende nuk kanë dalë në pension, por kanë punuar në punë të kategorizuara shumë të vështira dhe të vështira, të nëntokës, industrisë së naftës dhe metalurgjisë, llogaritja e shtesës do të bëhet vetëm pasi të jetë dorëzuar dokumentacioni i nevojshëm.
Instituti i Sigurimeve Shoqërore është duke hartuar një vendim të ri, në të cilin përcaktohen detyrimet që do të kenë këto kategori, si edhe pensionistët që janë aktualisht në skemë. Ky vendim pritet të kalojë për miratim brenda muajit gusht, duke qenë se në shtator parashikohet të nisë puna për aplikimin e shtesës, ndërkohë që gazeta ka mundur të mësojë edhe përmbajtjen e tij.
DOKUMENTET
Sipas draftit të ISSH- së, ata që janë mbi 48 vjeç e që zgjedhin të dalin në pension të parakohshëm dhe ata që dalin rishtazi, duhet që përveç kërkesës për caktim pensioni, të dorëzojnë edhe fotokopjen e dokumentit të identifikimit, i cili duhet të jetë brenda afatit të vlefshmërisë, i nënshkruar nga vetë personi; vërtetim i zyrës së Gjendjes Civile në rast të ndryshimit të gjeneraliteteve; librezë pune e plotësuar në të gjitha rubrikat, sipas llojit të punës; vërtetim për bazën e vlerësuar për periudhat e punësimit nga data 1.1.1994 deri në datën e ndërprerjes së marrëdhënieve financiare nga puna ose vetëpunësimi; vërtetim i posaçëm i konfirmimit të llojit të punës në profesionet e vështira; vërtetim për kryerjen e shërbimit të detyrueshëm ushtarak ( për burrat), si edhe çdo dokumentacion tjetër i lëshuar nga organizma shtetërore që konfirmon llojin dhe periudhën e punës. Ndërkohë, për pensionistët që janë aktualisht në skemë detyrimet janë minimale, çka do të thotë se mjafton vetëm një kërkesë dhe kopje e kartës së identitetit e nënshkruar prej tyre. Kjo, sepse dosja e plotë është në arkivin e ISSH- së, ndaj edhe nuk është i nevojshëm asnjë dokument tjetër shtesë.
RRITJA
Trajtimi me pensione suplementare për minatorët, naftëtarët dhe metalurgët do të ketë si referencë vitet e punës. Kështu, për minatorët rritja do të jetë me 1 për qind për çdo vit pune në nëntokë, ndërsa për metalurgët dhe naftëtarët, me 0.6 për qind për çdo vit kontributiv. Në argumentimin që i është bërë ligjit thuhet se për një minator që merr mesatarisht 23 mijë lekë pension, do të marrë një shtesë, e cila shkon deri në 4300 lekë në muaj. E njëjta gjë vlen edhe për metalurgët dhe naftëtarët, për të cilët rritja varion nga 9 për qind deri në 12 për qind. Shtesa, sipas ISSH- së, do të nisë të aplikohet në muajin shtator, por efektet do t'i ketë duke nisur nga muaji korrik. Në proces hartimi është edhe lista e re me profesionet e përditësuara, duke qenë se ka pasur ndryshime. Nga radhët e minatorëve do të përfitojnë të gjithë ata që kanë punuar si vagonistë, zjarrmëtarë në nëntokë, makinistë të sharrave prerëse në nëntokë, pompist i brendshëm në nëntokë etj.. Në industrinë e naftës dhe gazit përfshihen punë të vështira dhe shumë të vështira si p. sh. saldator dhe elektrosaldator në rezervuar, kulla dhe cisternë, punëtor i pastrimit të brendshëm të rezervuarëve, depove dhe cisternave të naftës etj.. Ndërsa në metalurgji, si punë të vështira klasifikohen punëtorët e shkrirjes dhe derdhjes së metalit, punët shumë të vështira në metalurgjinë e zezë e ferrokrom, si p. sh. në uzinën e petëzimit, në uzinën e gizës, në repartin e pjekjes, në uzinën e çelikut etj..