OSBE, Greminger: Gati të ofrojmë mbështetje “S’ka zgjidhje të qëndrueshme pa gjithëpërfshirje”
Sekretari i përgjithshëm i OSBE- së, Thomas Greminger, kërkoi dje dialog gjithëpërfshirës për tejkalimin e krizës. Këtë deklaratë ai e bëri gjatë një konference për shtyp me ministrin në Detyrë për Europën dhe Punët e Jashtme, Gent Cakaj, në kuadër të përgatitjes së kryesimit të kësaj organizate nga Shqipëria. “Ne pa diskutim ndjekim nga afër situatën politike dhe shpresojmë që ngërçi aktual politik do të tejkalohet dhe zgjidhet së shpejti. Besoj se zgjidhja duhet të gjendet brendapërbrenda. Ne inkurajojmë dialogun për gjetjen e përbashkët të zgjidhjes së problemeve. Në mënyrë që Shqipëria të bëjë përparime është e nevojshme që të gjithë aktorët politikë të angazhohen për funksionimin e plotë dhe të shëndetshëm të institucioneve demokratike dhe proceseve demokratike të këtij vendi. Pjesëmarrja në institucione demokratike është rruga e vetme legjitime për të pasur fuqi dhe influencë politike dhe dialogu, të cilit i referoheni duhet të realizohet duke respektuar tërësisht Kushtetutën dhe plotësisht institucionet legjitime. Më lejoni t’ju siguroj se OSBE- ja është e gatshme t’ju ofrojë mbështetje, por qartësisht asnjë zgjidhje nuk mund të jetë e qëndrueshme nëse nuk përfshihen të gjithë aktorët politikë në dhënien e një zgjidhjeje”, theksoi Greminger. Ministri në detyrë, Gent Cakaj, në emër të qeverisë shqiptare u shpreh që maxhoranca është gatshme për dialog, por pa cenuar legjitimitetin e institucioneve ekzistuese. “Çfarëdo dialogu politik mes të gjithë partive politike apo aktorëve, duhet të zërë fill në respektim të plotë të institucioneve kushtetuese”, theksoi Cakaj. Gjatë konferencës për shtyp, zyrtari i OSBE- së u ndal te zgjedhjet e 30 qershorit, ku theksoi se legjitimitetin e tyre do ta përcaktojë Gjykata Kushtetuese. “Ligjshmëria e zgjedhjeve vendore duhet të përcaktohet nga institucionet shqiptare dhe jo komuniteti ndërkombëtar. Presim që anëtarët e Gjykatës Kushtetuese të sillen në mënyrë profesionale. Sa u takon emrave të kryetarëve të bashkive dhe anëtarëve të këshillave bashkiakë, do të varen nga vendimmarrja e institucioneve të brendshme”, theksoi zyrtari i OSBE- së. Krahas kësaj, ai kërkoi respektimin e standardeve për lirinë e medias, pas kritikave të bëra nga OSBE- ja për ligjin antishpifje.