PRESIDENTI THAÇI DO TAKOHET ME UDHËHEQËSIT E PARTIVE POLITIKE

Në Kosovë, Presidenti Hashim Thaçi pret të takojë nga java e ardhshme udhëheqësit e partive politike për të diskutuar siç thuhet, për hapat e nevojshme pas dorëheqjes së Kryeministrit Ramush Haradinaj. Kjo është bërë e ditur nëpërmjet një njoftimi të zyrës së Presidentit të Kosovës, në të cilën thuhet se çdo veprim do të jetë në pajtim me Kushtetutën e Kosovës. Në njoftim thuhet se, “bazuar në kompetencat kushtetuese, Presidenti i Kosovës përfaqëson unitetin e popullit dhe është garantues i funksionimit demokratik të institucioneve shtetërore. Prandaj, çdo hap që do të ndërmarrë Presidenti do të jetë në përputhje vetëm me interesat e qytetarëve dhe interesat shtetërore”. Kjo u jep fund pritjeve të partive politike, të cilat kanë bërë thirrje të vazhdueshme për këshillime me Presidentin e vendit, në mënyrë që të diskutohet data e mbajtjes së zgjedhjeve të parakohshme parlamentare. Javën e kaluar, Kryeministri Ramush Haradinaj dha dorëheqjen nga posti i tij, pasi u thirr për t’u marrë në pyetje nga Prokuroria e Posaçme në Hagë. Dorëheqja e zotit Haradinaj i dha fund koalicionit ndërmjet Partisë Demokratike, Aleancës për Ardhmërinë e Kosovës dhe Nismës Socialdemokrate, që garuan së bashku në zgjedhjet e përgjithshme të 11 qershorit të vitit 2017. Ngritja e qeverisë Haradinaj u bë në fillim të shtatorit të atij viti dhe përgjatë tërë kësaj kohe u përball me vështirësi në kalimin e ligjeve në Parlament për shkak të votave të pakta. Pak ditë para dorëheqjes së zotit Haradinaj dolën sheshazi më shumë se kurrë edhe përplasjet e brendshme ndërmjet drejtuesve të koalicionit qeverisës, që lidheshin më shumë me qasjen ndaj tarifave të Kosovës ndaj mallrave serbe dhe bisedimeve me Serbinë.