Me 1.5 milionë euro në bankë, ish- zyrtarit i konfiskohet pasuria, Shehu: Shita hotelin

KERKOI T’I TRANSFERONTE JASHTE. SI U SHKARKUA NE 2011 NGA ALUIZNI

Policia e Shtetit njoftoi dje për sekuestrimin e një llogarie bankare të një ish- zyrtari të Agjencisë së Legalizimit, Urbanizimit dhe Integrimit të Zonave Urbane.

Megjithëse emri nuk u bë i ditur zyrtarisht nga Policia, burime konfirmuan se bëhej fjalë për ish- drejtorin e ALUIZNI- t, Ferdinand Shehun, të cilit i janë bllokuar 1.5 milionë euro. Duke iu referuar njoftimit zyrtar, sekuestrimi erdhi si rezultat i operacionit të koduar “Investimi” dhe është drejtuar nga Prokuroria e Tiranës, e cila ka kryer verifikimet paraprake dhe ka kërkuar bllokimin e kësaj shume, një pjesë e të cilës do të transferohej jashtë vendit. “Sekuestrohen 1,5 milionë euro llogari banke, të dyshuara se janë përfituar nga burime të paligjshme”, shkruhej në hyrje të njoftimit zyrtar të Policisë. Ndërkohë, Prokuroria ka shënuar edhe një procedim penal dhe është duke hetuar për pastrim të parave, por nuk është marrë ndonjë masë personale ndaj tij, i cili këto ditë ndodhet në Itali.

OPERACIONI Burime zyrtare bënë të ditur se operacioni është zhvilluar në bashkëpunim të Drejtorive të Krimit Ekonomik dhe Pastrimit të Parave në Policinë e Tiranës nën drejtimin e Prokurorisë së kryeqytetit. Në njoftim, Policia nuk bënte të ditur identitetin e ish- zyrtarit dhe as inicialet e tij, por përcaktonte se në vitet 2006- 2011 ka mbajtur funksion zyrtar tek ALUIZNI. “Në vijim të punës për gjurmimin, evidentimin dhe sekuestrimin e pasurive të paluajtshme dhe të shumave financiare, që dyshohet se janë përfituar nga burime të paligjshme, Drejtoria për Hetimin e Krimeve Ekonomike e Financiare në Departamentin e Policisë Kriminale, në bashkëpunim me Seksionin për Hetimin e Pastrimit të Parave, në Drejtorinë Vendore të Policisë Tiranë, nën drejtimin e Prokurorisë së Rrethit Gjyqësor Tiranë, finalizoi operacionin policor të koduar ‘ Investimi’, për sekuestrimin e 1 500 000 eurove llogari bankare, të një shtetasi, ish- punonjës i administratës shtetërore, i cili në vitet 2006- 2011 ka mbajtur funksione zyrtare në Agjencinë e Legalizimit, Urbanizimit dhe Integrimit të Zonave Urbane.”, njoftoi Policia.

AKUZA Zyrtarisht bëhet me dije se për ish- zyrtarin e ALUIZNIt është shënuar edhe procedimi penal për pastrim e parash. Sipas Policisë, ky shtetas ka kryer disa investime në pasuri të paluajtshme, duke bërë kështu edhe pastrimin e parave. “Ky shtetas dyshohet se ka konsumuar veprën penale ‘ Pastrimi i produkteve të veprës penale’, parashikuar nga neni 287 i Kodit Penal, duke kryer disa investime në pasuritë e paluajtshme”, shkruhet në njoftim.

TRANSFERIMI Duke iu referuar burimeve zyrtare, Shehu nëpërmjet një banke private është përpjekur të transferojë jashtë vendit një shumë prej 1 milionë eurosh, me arsyetimin se do të bënte investime financiare. Pjesën tjetër të vlerës së sekuestruar e ka vendosur në një depozitë pa afat. “Kohët e fundit, nëpërmjet një banke private, shtetasi i lartpërmendur ka tentuar transferimin e 1 milionë eurove jashtë vendit, me justifikimin për investime financiare, ndërkohë 500 000 euro të tjera i ka vendosur në depozitë me afat. Për arsye se hetimet janë në vijim, nuk mund të jepen të dhëna të tjera”, përfundon njoftimin Policia e Shtetit. Në reagimet publike për mediat, Shehu e ka konsideruar si të pavërtetë pretendimin e Prokurorisë dhe se e gjithë kjo ishte një tentativë për të prishur imazhin.