Plotësimi me 6 anëtarë, afati për Kushtetuesen mund të shtyhet
SPAK do të ngrihet pasi kandidatët të kalojnë vetingun
Qeveria ka përcaktuar buxhetin fillestar për Strukturën e Posaçme Antikorrupsion për vitin 2019, shumë e cila arrin në 150 milionë lekë.
Sipas VKM- së së bërë publike, kjo shifër e përcaktuar është vënë në dispozicion për të gjitha shpenzimet që do të ketë ky institucion për funksionimin e tij. Kjo strukturë pritet të hetojë korrupsionin në nivele të larta drejtuese. “Në mbështetje të nenit 100 të Kushtetutës, të pikës 10, të nenit 57, të ligjit nr. 95/ 2016, ‘ Për organizimin dhe funksionimin e institucioneve për të luftuar korrupsionin dhe krimin e organizuar’, me propozimin e ministrit të Drejtësisë dhe të ministrit të Financave dhe Ekonomisë, Këshilli i Ministrave vendosi: Strukturës së Posaçme kundër Korrupsionit dhe Krimit të Organizuar i përcaktohet për vitin 2019 buxheti fillestar prej 150 000 000 ( njëqind e pesëdhjetë milionë) lekësh, për përballimin e shpenzimeve lidhur me ushtrimin e aktivitetit gjatë vitit 2019. Ngarkohen Struktura e Posaçme kundër Korrupsionit dhe Krimit të Organizuar dhe Ministria e Financave dhe Ekonomisë për ndjekjen e procedurave për zbatimin e këtij vendimi”, shkruhet në vendim.
SPAK Këshilli i Lartë i Prokurorisë miratoi në 16 korrik listën e 15 prokurorëve që pas procedurës së përzgjedhjes për të qenë pjesë e Strukturës së Posaçme Antikorrupsion, morën pikët më të larta. Surpriza e listës së miratuar nga KLP është mungesa e drejtueses së Prokurorisë së Krimeve të Rënda, Donika Prela, dhe ish- drejtuesit të kësaj Prokurorie, Besim Hajdarmataj. Ndërkohë, jashtë 15 më të mirëve janë lënë edhe dy prokurorët e dosjeve me të diskutuara të momentit, Vladimir Mara dhe Dritan Prençi. Sipas Këshillit, renditja e kandidatëve që kërkojnë të jenë pjesë e SPAK është bërë pas vlerësimit të letrës së motivimit, akteve rreth procedimeve penale të kandidatëve, informacionet nga burimet e hapura përveç dokumenteve të prezantuara nga kandidatët. Struktura e Posaçme Antikorrupsion, e njohur gjerësisht si SPAK, do të jetë e specializuar për hetimin e korrupsionit dhe krimit të organizuar. Prandaj, edhe një nga kriteret e parashikuara në ligj për anëtarin e Prokurorisë së Posaçme, është edhe eksperienca në hetimet për krimin e organizuar dhe korrupsionit. Ndërkohë, ngritja e SPAK do të shkrijë Gjykatën për Krime të Rënda dhe një pjesë kompetencave të kësaj të fundit do t’u kalojnë gjykatave në rrethe.