Kandidatët, në rrezik plotësimi i 6 vendeve në Gjykatën Kushtetuese

VOA argumenton se numri i kufizuar i kandidatëve mund të krijojë ngërçe në ngritjen e Kushtetueses

Duke analizuar procesin e përzgjedhjes së anëtarëve të Gjykatës Kushtetuese në një shkrim të botuar dje, “Zëri i Amerikës” ngre shqetësimin se ky proces nuk do të përfundojë me ngritjen e kësaj gjykate.

Në shkrim, VOA veçon dy situatat, që mund të çojnë në pengimin e plotësimit të Gjykatës Kushtetuese me anëtarë, së pari përjashtimi nga gara e tre kandidatëve nga ana e KED- së në mbledhjen e fundit, çka detyron Parlamentin të shpallë edhe një herë thirrjen, ndërsa Gjykata Kushtetuese të plotësohet me minimumin e saj, me 5 anëtarë. Së dyti, sipas VOA- s, duket se çdo gjë do t’i mbetet në dorë Presidentit Ilir Meta. Kandidatë për vakancat e shpallura nga Presidenca janë: Arta Vorpsi, Besnik Muçi dhe Elsa Toska. Nëse Presidenti do të zgjidhte një nga këta kandidatë, do të mbeste pa kandidat një nga vakancat e shpallura nga Parlamenti. SHKRIMI I PLOTË Në Shqipëri, procesi i nisur për anëtarët e rinj të Gjykatës Kushtetuese nuk do të mund të çojë në plotësimin e 6 vendeve bosh, të cilat duhet të emërohen 3 nga Presidenti dhe 3 nga Parlamenti. Në mbledhjen e fundit të dy ditëve më parë, Këshilli i Emërimeve në Drejtësi ka vendosur ndalimin e kandidimit ndërmjet të tjerëve dhe për Fiona Papajorgjin, Valbona Balën dhe Sinan Tafajn. Këta tre emra ishin të vetmit që kandidonin për zëvendësimin e ish- anëtarit të Gjykatës Kushtetuese, Fatos Lulo, të rrëzuar nga procesi i rivlerësimit të gjyqtarëve. Në një situatë të tillë, në përfundim të të gjitha procedurave, Parlamentit i duhet të shpallë një thirrje të re. Në këtë mënyrë, Gjykata Kushtetuese, e cila aktualisht ka vetëm një anëtar, Vitore Tushën, pritet të ketë vetëm 5 anëtarë të rinj, duke bërë që numri të shkojë në limitet e funksionimit të saj dhe mundësisë së vendimmarrjes, vetëm me 6 gjyqtarë. Por ky proces rrezikohet dhe nga një moment tjetër, që mund ta reduktojë edhe me një tjetër anëtar Gjykatën. Për shkak të numrit të kufizuar të kandidatëve që janë përzgjedhur, gjithçka duket se do të jetë në dorë të Presidentit Ilir Meta. Nëse kreu i shtetit për tri vendet vakante të shpallura prej tij do të përzgjidhte emrat e Arta Vorpsit, Besnik Muçit dhe Elsa Toskës, atëherë automatikisht, do të mbetej pa kandidat vakanca e shpallur nga Parlamenti për zëvendësuesin e ish- anëtarit Vladimir Kristo. Ky rast mund të tejkalohet nëse do të ketë një koordinim mes dy institucioneve, në mënyrë që të mos pengojnë njëra- tjetrën, dhe Presidenti do të zgjidhte të paktën një nga dy kandidatët e tjerë të kualifikuar. Deri tani, 12 kandidatë janë rrëzuar dhe vetëm 5 janë përzgjedhur. Nga këta, Besnik Muçi pret vendimin e Kolegjit të Posaçëm të Apelimit në fillim të shtatorit, ndërsa për Regleta Panajotin, pritet të shihet nëse Komisioneri Publik do të bëjë ose jo ankimim për vendimin e Komisionit të Pavarur të Kualifikimit, i cili e konfirmoi atë në detyrë. Në listë janë dhe dy kandidatë të tjerë në pritje të shqyrtimit.

Në një situatë të tillë, në përfundim të të gjitha procedurave, Parlamentit i duhet të shpallë një thirrje të re. Në këtë mënyrë, Gjykata Kushtetuese, e cila aktualisht ka vetëm një anëtar, Vitore Tushën, pritet të ketë vetëm 5 anëtarë të rinj, duke bërë që numri të shkojë në limitet e funksionimit të saj dhe mundësisë së vendimmarrjes, vetëm me 6 gjyqtarë