Nga Teatri te zgjedhjet, çfarë mban peng mungesa e Kushtetueses

Gjykata Kushtetuese, e konsideruar edhe si “gardiani” i drejtësisë, prej disa muajsh ka dalë jashtë funksionit, duke mbetur me vetëm një anëtar, ndërsa procesi për plotësimin e saj po has vështirësi. Si organi më i lartë i drejtësisë që garanton respektimin e Kushtetutës dhe bën interpretimin përfundimtar të saj, mosekzistenca po mban pezull një sërë çështjesh të rëndësishme në vend. Kështu, kohët e fundit, debati publik për mungesën e Gjykatës Kushtetuese është nxitur edhe nga çështje, të cilat marrin zgjidhje vetëm pas ngritjes së saj. Do të jetë kjo Gjykatë, e cila do të marrë vendimin përfundimtar për shkarkimin e Presidentit Ilir Meta, për të cilin maxhoranca ka ngritur edhe një Komision Hetimor, për shkeljet që ata pretendojnë se janë bërë me anulimin e zgjedhjeve të 30 qershorit. Një tjetër çështje, e cila është çuar në Gjykatën Kushtetuese, është edhe ajo e zgjedhjeve, për ligjshmërinë e tyre. Ka qenë Voltana Ademi, e cila, pas daljes nga Gjykata, tha se kërkesa e tyre ka si objekt konstatimin antikushtetues të zgjedhjeve të 30 qershorit dhe certifikimin e kushtetutshmërisë të veprimtarisë së Partisë Bindja Demokratike, lidhur me regjistrimin e saj në Gjykatë për zgjedhjet e 30 qershorit. Edhe çështja e Teatrit Kombëtar është çuar në Gjykatën Kushtetuese. Ka qenë Presidenti Ilir Meta, i cili me anë të një kërkese të dorëzuar në këtë Gjykatë, ka kërkuar shfuqizimin e ligjit. “Dua të theksoj rëndësinë e madhe që ka akti im sot, i cili është në koherencë të plotë me përpjekjet e mia të qëndrueshme në raport me qeverinë dhe institucionet vendore të përfshira në këtë proces kriminal të kapjes flagrante të shtetit dhe njëkohësisht në kundërshtim të plotë edhe me interesat kombëtare të vendit tonë. Ky ligj është një simbol, një kryevepër, ku si asnjëherë tjetër, kryhet në harmoni të plotë një krim kushtetues, një krim kombëtar dhe e gjitha kjo në interes të oligarkëve”.