PD denoncon 2 skandalet: Pas kasave fiskale fshihet vëllai i Kryeministrit
Basha: Afera tjetër me kasat fiskale siç e paralajmëruam para disa muajsh, çdo biznes do të paguajë tarifë shtesë
Partia Demokratike ka denoncuar dje dy nisma të qeverisë, duke theksuar se pas tyre qëndron vëllai i Kryeministrit, Olsi Rama.
Vetë kryetari i Partisë Demokratike, gjatë një takimi me strukturat e PD- së në qytetin e Cërrikut, deklaroi se qeveria po grabit paratë e qytetarëve, duke iu referuar tenderit të Ministrisë së Brendshme për uniformat e reja të Policisë së Shtetit. "Shqiptarët janë të papunë për shkak të vjedhjes dhe të hajdutërisë së Edi Ramës, të cilën nuk e ka parë dhe nuk e ka njohur Ballkani. Shikoni Milot Balldrenin, 7- fish koston e rrugës, shikoni Orikumin, Vlorën. Vetëm këtë javë shikoni vjedhjet që bëjnë me tenderin e uniformës së Policisë, dyfish i çmimit, nga 15 milionë në 30 milionë", theksoi Basha. Krahas kësaj, ai u ndal edhe te nisma tjetër e Ministrisë së Financave për të ndryshuar monitorimin e bizneseve. Sipas tij, te kjo nismë qëndron prapa vëllai i Kryeministrit Rama. "Shikoni aferën tjetër me kasat fiskale siç e paralajmëruam para disa muajsh. Çdo biznes do të paguajë tarifë shtesë. Nuk ka kompani kroate. Është Olsi Rama. Pra, është Edi Rama që do t'i fusë ato para në xhep", u shpreh Basha. Kreu i opozitës theksoi se e vetmja politikë e Ramës është hajdutëria dhe grabitja me koncesione, me tendera, me PPP, grabitja e bregdetit, e minierave, e naftës, e taksave. "Grabitja dhe pasurimi i tij dhe një grushti oligarkësh është i vetmi shkak për varfërimin e shqiptarëve, për rritjen e kostos së jetës, për shpunësimin masiv, për pamundësinë për të gjetur një vend pune", theksoi kreu i opozitës.
DENONCIMI
Tenderin për uniformat e reja të Policisë së Shtetit e denoncoi dje edhe Lealba Pelinku, kryetarja e Departamentit Antikorrupsion në PD. Sipas saj, qeveria ka shkurtuar kohën e tenderimit për të favorizuar një kompani. "Kur bëhet fjalë për abuzimin me miliona euro, Sandër Lleshaj nuk ndryshon nga paraardhësit e tij, Saimir Tahiri apo Fatmir Xhafaj. Gjuetia e preferuar e ministrave të Brendshëm të Edi Ramës është tenderi 30 milionë euro me uniformat e Policisë. Kësaj radhe, mënyra e gjetur për të vjedhur është paracaktimi i fituesit përmes shkeljes së procedurave ligjore për rregulla të barabarta loje dhe konkurrencë të drejtë në treg. Për të përjashtuar garën në tenderin e hapur pak ditë më parë, Ministria e Brendshme ka përgjysmuar afatin minimal të parashikuar në ligj për t'u bërë pjesë e tenderit dhe për të plotësuar kushtet e tij. Ligji i Prokurimit Publik parashikon një afat minimal 52- ditor, por Sandër Lleshaj, në shkelje të ligjit, ka vendosur shkurtimin e afateve për ata që duan të konkurrojnë në 24 ditë. Ky është një afat kohor i pamjaftueshëm për të përmbushur detyrimin ligjor që dikton kushte të barabarta gare dhe konkurrence. Shkelja e të tilla garancive ligjore është tregues direkt se kemi të bëjmë me një aferë korruptive. Kemi të bëjmë me një pazar mes atij që drejton Ministrinë e Brendshme dhe klientit të paracaktuar, për favorizimin e të cilit ngushtohen ditët e garës dhe shmangen konkurrentët e tjerë", theksoi kryetarja e Departamentit Antikorrupsion në Partinë Demokratike.