Universitetet, rrudhen financat për akreditimin e ekspertëve të huaj

Agjencia e Akreditimit duket se nuk ia ka dalë dot me pagesat e anëtarëve të huaj përfaqësues në Bordin e Akreditimit të Universiteteve, ndaj i ka propozuar qeverisë të përgjysmojë masën e shpërblimit të tyre për çdo mbledhje. Një ditë më parë, Këshilli i Ministrave vendosi që për çdo mbledhje, ekspertët e huaj të mos marrin më 1200 euro, por vetëm 600. Ndërsa anëtarët shqiptarë, sipas vendimit të vitit 2017, për të njëjtën punë paguhen 30 mijë lekë. Për të shmangur diskriminimet, qeveria ka vendosur të përfshijë në trajtimin me udhëtime apo akomodime, të gjithë anëtarët, të huaj e shqiptarë, të cilët janë me rezidencë të përhershme jashtë Shqipërisë. Shkurtimet kanë prekur edhe ekspertët që merren me vlerësimin e hapjes apo riorganizimit të IAL- ve dhe programeve të studimit. Nëse më parë, vetëm njëri parashikohej të merrte një tarifë fikse të shumës që paguan universiteti, tashmë përcaktohet që minimalisht duhet të jenë dy ekspertë që të paguhen jo më tepër se vlera e mësipërme. Sakaq, një pikë shtesë sqaruese saktëson vlerën që marrin ekspertët kur bëjnë vlerësimin e jashtëm për herë të parë të një programi studimi. “Vlerësimi i jashtëm në kuadër të akreditimit të parë të programeve profesionale të studimit, si dhe të programeve të studimit të ciklit të parë dhe të dytë në IAL- të publike bëhet i grupuar, aty ku është e mundur dhe për jo më shumë se tri programe, sipas ciklit dhe fushës së studimit në nivel njësie bazë. Tarifat për vlerësimin në kuadër të akreditimit të parë të këtyre programeve të jenë sa 65% e tarifës së secilit program që do të vlerësohet i grupuar”, nënvizohet në vendim. Një shumë e përafërt, 70% e vlerës së programit, vlen edhe për vlerësimin në kuadër të akreditimit të një programi profesional.