Piro Misha, drejtori i ri i Bibliotekës Kombëtare, Rama firmos vendimin
Drejtori i ri do të përballet me krizën e hapësirave në BKSH dhe sfidën e një ndërtese të re
Piro Misha është drejtori i ri i Bibliotekës Kombëtare të Shqipërisë.
Në mbledhjen e fundit të qeverisë, Kryeministri Edi Rama firmosi emërimin e përkthyesit dhe publicistit në krye të BKSH- së. Pas dorëheqjes së ish- drejtores së këtij institucioni, Persida Asllani, Ministria e Kulturës shpalli konkursin për këtë pozicion. Nga sa mësohet, kandidaturat për këtë post nuk kanë qenë të shumta dhe në fund të procesit, ministrja e Kulturës, Elva Margariti, i ka propozuar Kryeministrit Rama emrin e Mishës. Piro Misha është një nga emrat më të njohur të letrave shqipe, përkthyes, publicist, botues, autor i disa librave, njeri i angazhuar në çështje me ndjeshmëri qytetare. Prej vitit 2001 e deri më sot, ai ka qenë drejtor ekzekutiv i Institutit të Komunikimit dhe Dialogut. Përpara viteve ’ 90 ka qenë redaktor dhe përkthyes nga gjuha angleze, frënge dhe italiane, pranë shtëpisë botuese “Naim Frashëri”, ku ka përkthyer mbi 30 tituj. Po ashtu, ka qenë shef i redaksisë së romanit në shtëpinë botuese “Naim Frashëri”. Ka dhënë leksione e konferenca nëpër universitete dhe institucione në Europë dhe në Amerikën e Veriut.
Ministrja e Kulturës, Elva Margariti, duke i shprehur mirëseardhjen dhe duke i uruar punë të mbarë, u shpreh se së bashku me drejtorin e ri do të çohen përpara projektet për një bibliotekë të re, moderne dhe më pranë lexuesit.
Aktualisht, Piro Mishës do t’i duhet të përballet me një problematikë komplekse në BKSH, të cilat burojnë nga kriza e hapësirave në godinë, ku ndodhet aktualisht ky institucion. U bënë dekada thuajse, që kur drejtuesit e bibliotekës më të rëndësishme në vend kanë vënë alarmin për mungesën e hapësirave, për infrastrukturën e vjetruar dhe nevojën emergjente për një bibliotekë të kryeqytetit, që do të shkarkonte ngarkesën e Bibliotekës Kombëtare nga shërbimet rutinë, nga nevoja e qytetarëve për hapësira për të shfletuar shtypin e përditshëm apo studiuesve dhe studentëve për një kënd të qetë studimi. Ngritja e bibliotekës së re do të jetë sfida më e madhe e drejtorit të ri.
Piro Misha zëvendësoi Persida Asllanin, e cila e mbajti këtë pozicion për 5 vjet. Kjo e fundit dha dorëheqjen, duke zgjedhur mes postit të drejtores së BKSH- së dhe karrierës akademike, këtë të fundit. Ajo i është rikthyer me kohë të plotë Fakultetit të HistoriFilologjisë.