Rikonstruktohet Muzeu i Arsimit, Mësonjëtorja e Parë Shqipe
Rikonstruktohet ndërtesa e famshme e Mësonjëtores së Parë Shqipe. Me një fond nga buxheti i shtetit do të rikonstruktohet dhe rikonceptohet muzeu më i rëndësishëm i arsimit shqiptar, Muzeu Kombëtar i Arsimit “ABC”. Tërmetet e njëpasnjëshme në qytetin e Korçës e rënduan edhe më tepër situatën në ndërtesën, që prej kohësh paraqiste problematika në strukturën e saj. Lëkundjet sizmike jo vetëm sollën dëmtime, por e kthyen këtë institucion në të pavizitueshëm dhe të rrezikshëm për vizitorët. Pas mbylljes së tij u përcaktua një fond për një ndërhyrje urgjente. Lajmin e ka dhënë ministrja e Kulturës, Elva Margariti, pas një inspektimi në qytetin e Korçës. “Pas lëkundjeve të fundit sizmike në Korçë, lindi nevoja urgjente për të ndërhyrë në shpëtimin e godinës së Mësonjëtores së Parë Shqipe, simbolit të luftës për dije dhe dritë. Me një fond prej 30 milionë lekësh do të ndërhyhet për rikonstruksionin e ndërtesës, e cila ka pësuar çarje të mureve, por edhe për rikonceptimin e saj, duke e sjellë në standardet bashkëkohore muzeologjike. Muzeu “ABC” është një institucion i rëndësishëm jo vetëm për Korçën, por për gjithë historinë e arsimit shqip”, shprehet Margariti, e cila ka urdhëruar zbrazjen e godinës dhe inventarizimin e të gjitha artefakteve. Sipas drejtorit të Drejtorisë Rajonale të Trashëgimisë Kulturore, Gjergji Koki, “projekti parashikon 2 faza dhe është hartuar nga ekipi i palodhur i DRTK, jo vetëm si një detyrim institucional, por si një detyrim ndaj historisë, Korçës dhe kombit”.
Sipas raportit të specialistëve, fasada veriore dhe jugore kanë pësuar deformime, duke devijuar nga vertikaliteti, çatia, dyert e dritaret janë të amortizuara.