Serbia superarmatoset nga Rusia me blinde dhe tanke
Vuçiç falënderon Putin që “forcoi” Ushtrinë serbe
Presidenti serb, Aleksandar Vuçiç, falënderoi Presidentin rus Vladimir Putin për “forcimin” e Ushtrisë së Serbisë.
Deklarata e tij u bë ndërsa inspektonte 10 automjetet e blinduara ruse të sapombërritura në një bazë të Ushtrisë serbe në Nish. Sipas “Zërit të Amerikës”, të transportuara në Serbi me avionë rusë përmes hapësirës ajrore hungareze, grupi i automjeteve të kundërzbulimit “BRDM- 2” është pjesë e një dërgese shumë më të madhe. Pjesa e mbetur e kësaj dërgese janë rreth 20 automjete të tjera të kundërzbulimit dhe dhjetëra tanke të përmirësuara të epokës sovjetike T- 72, që u bllokuan në kufirin rumun. Sipas një deklarate të Ministrisë së Jashtme të Rumanisë, zyrtarët e doganës rumune nuk lejuan kalimin e tyre përmes lumit Danub për shkak të sanksioneve të Bashkimit Europian ndaj Rusisë në lidhje me veprimet e saj në Ukrainë. Serbia shprehu zhgënjim në lidhje me pjesën e bllokuar të dërgesës. Hungaria, njëkohësisht anëtare e BEsë dhe e NATO- s, mbrojti vendimin e saj për të lejuar kalimin e pajisjeve ruse nëpër hapësirën e saj ajrore, pavarësisht sanksioneve europiane ndaj Rusisë. Duke iu drejtuar gazetarëve në Budapest të mërkurën, shefi i kabinetit të Kryeministrit hungarez, Viktor Orban, Gergely Gulyas tha se dërgesa ishte miratuar sepse ngarkesa do të kalonte nëpër hapësirën ajrore hungareze në një aeroplan civil dhe jo ushtarak. I pyetur nëse Hungarisë do t’i kërkohet llogari për shkeljen, një zëdhënës i BE- së tha se, “Ne kemi i parë njoftimet. Pa komentuar mbi specifikat, zbatimi i masave kufizuese të BE- së është përgjegjësi e vendeve anëtare të BE- së”.
Edhe zyrtarët e NATO- s nuk thanë shumë në lidhje me përpjekjet e fundit të Rusisë për të ndihmuar Serbinë të forcojë Ushtrinë e saj. “NATO- ja respekton plotësisht të drejtën sovrane të të gjitha vendeve, përfshirë Serbinë, për të vendosur për marrëveshjet e tyre politike dhe të sigurisë”, tha një zëdhënës i NATO- s për “Zërin e Amerikës”. Ai shtoi se “Në të njëjtën kohë, NATO dhe Serbia janë partnerë. Serbia ishte organizatore e stërvitjes sonë më të madhe të urgjencës civile, e cila ndihmoi aleatët e NATO- s, Serbinë dhe partnerët e tjerë të rrisin gatishmërinë për trajtimin e fatkeqësive natyrore, si përmbytjet dhe zjarret”. Zëdhënësi shtoi se NATO ka punuar me Serbinë për të reformuar forcat dhe institucionet e sigurisë, trajnimet e NATO- s, gjithashtu ndihmojnë ushtarët serbë të kontribuojnë në misionet paqeruajtëse ndërkombëtare.
Serbia, e cila pretendon se është neutrale në aspektin ushtarak, tashmë ka marrë gjashtë avionë luftarakë MiG- 29 nga Rusia dhe po negocion blerje shtesë të armëve nga Rusia, përfshirë helikopterë luftarakë dhe transporti, si dhe sisteme të mbrojtjes ajrore. Disa ekspertë besojnë se forcimi ushtarak i Serbisë, i mbështetur nga Rusia, kërcënon paqen në rajonin e brishtë politik të Ballkanit. Zyrtarët e Departamentit Amerikan të Shtetit ende nuk u janë përgjigjur kërkesave të “Zërit të Amerikës” për një reagim mbi këtë çështje. ( Marrë me shkurtime
nga VOA)