Shpërthen Lerda: E turpshme ajo që bënë arbitrat
Trajneri i Partizanit flet si shqiptar dhe harmonizohet me vendin e skuadrës që drejton. Franko Lerda, në konferencën e dhënë për mediat në Moldavi, e ka konsideruar të rëndë mënyrën si është eliminuar skuadra e tij dhe ndër të tjera ka përmendur se "jemi vend i vogël".
ELIMINIMI
Në deklaratën e dhënë për mediat moldave, të shpërndarë nga zyra për shtyp e Partizanit në faqen zyrtare, trajneri i të kuqve ka qenë i irrituar për episodin që ka sjellë edhe golin e Sherifit, i cili eliminoi të kuqtë. "Kjo është gjëja më negative absolutisht në futboll. Mund të humbësh e fitosh ndeshje, por në këtë mënyrë të shqetëson shumë. Jemi vend i vogël dhe ndodhin këto raste të dyshimta. Gjyqtari o duhet të ngrejë flamurin ose jo, nuk ka asgjë për të ndryshuar vendimin", është shprehur fillimisht trajneri i të kuqve.
NDESHJA
Më tej, italiani ka falënderuar futbollistët për çfarë kanë treguar në këtë 90- minutësh, pavarësisht mënyrës si përfundoi. "Është e kotë të flasim për rezultat. Komplimente djemve, edhe atyre në pankinë e në tribunë se kanë bërë gjithçka si duhet. Kemi qenë bashkë, kemi dhënë maksimumin dhe mund të merrnim diçka më shumë", ka vijuar fjalën e tij numri një i pankinës së skuadrës kryeqytetase.
GOLI I SHERIF
"Tek episodi fola me gjyqtarin e katërt dhe e pyeta pse u ndryshua vendimi. Sapo pësuam golin, pashë vijërojtësin që kishte çuar flamurin dhe isha i qetë. Por ata e ndërruan vendimin dhe nuk kishte si ta shihnin e merrnin vendim ndryshe. Ky është turp, është e turpshme. Nesër kalon gjithçka, por klubi ka pësuar një dëm të madh.
Djemve nuk mund t'u them gjë tjetër, kemi bërë tre ndeshje ne lartësinë e duhur, kanë mbajtur lart figurën e Partizanit. Nuk mund ta quaj katastrofë ndeshjen e parë ndaj Sherif në Tiranë, të gjithë kanë bërë mirë. Të jenë krenarë, shumë krenarë se kemi dalë me kokën lart. Ishim në lojë, e kishim raste të rëndësishme, kishim mundësi, erdhëm këtu e luajtëm futboll e nuk u paraqitëm keq, luajtëm futboll e patëm mundësi të kalonim. Por përtej rasteve, kishte 5- 6 situata ku gjyqtari ndalte lojën kundër nesh, edhe faulli i golit nuk ishte. Pastaj Braun i mori topin kundërshtarit, po shkonte në portë, por ai e ndali me 3 futbollistë tanët në zonë. Janë raste që vendosin ndeshjen", deklaroi trajneri i të kuqve.