PER APARTAMENTET
Nis taksa e re në Tiranë, si kompensohen pensionistët
Pas mbylljes së 30 qershorit, Bashkia e Tiranës nis zbatimin e taksës së re për apartamentet. Pakti mes UKT dhe Bashkisë u lë afat të gjithë kryefamiljarëve deri më 15 shtator për vetëdeklarimin e sipërfaqes së shtëpive. Si do llogaritet taksa e re dhe ku do bëhet deklarimi. Pensionistët që shmangin pagesën dhe tri kategoritë e tjera që përjashtohen
Pas mbylljes së zgjedhjeve, Bashkia e Tiranës ka vendosur të aplikojë taksën e re të ndërtesës për të gjithë qytetin. Do të jetë Ujësjellësi, i cili do të mbledhë taksën në faturat e ujit.
Marrëveshja mes Bashkisë dhe Ujësjellësit është firmosur vetëm 4 ditë para 30 qershorit dhe është bërë publike pasi votimet mbaruan. Duhet theksuar se taksa e re e shtëpive është miratuar para më shumë se një viti dhe nga 1 prilli i vitit të kaluar duhet të zbatohej. Por Bashkia e Tiranës priti deri në fund të qershorit, që përkonte me votimet, për të lidhur marrëveshjen me Ujësjellësin, që të mbledhë paratë me taksën e re.
SI DO LLOGARITET TAKSA
Aktualisht, taksa e banesës është fikse. Taksa e re që do të aplikohet do të jetë në bazë të sipërfaqes. Ujësjellësi ka sqaruar në njoftimin e vet, se "Baza e llogaritjes së taksës së ndërtesës është vlera e "ndërtesës" shumëzuar me shkallën në përqindje të taksës së miratuar me ligj për kategorinë e ndërtesave për banim, që është 0.05%". Pra, një banesë me një çmim prej 80 mijë lekë metra/ katror, do të paguajë 400 lekë për metër taksë shtëpie në vit. Në rast se shtëpia është 100 metra, taksa do të jetë 4 mijë lekë në vit. Sipas Ujësjellësit, taksa do të faturohet në faturën e ujit çdo muaj. Pra, do të pjesëtohet për 12 muaj.
VETËDEKLARIMI
Të gjithë kryefamiljarët dhe taksapaguesit duhet të vetëdeklarojnë sipërfaqen e shtëpisë në pikat e Ujësjellësit. "Çdo taksapagues duhet të vetëdeklarojë të dhënat për pasurinë e tij të paluajtshme ndërtesë/ njësi pronësore, që ka në pronësi apo në përdorim. Vetëdeklarimi bëhet pranë njësisë së vetëqeverisjes vendore apo çdo institucioni të autorizuar nga qeveria apo njësitë e vetëqeverisjes vendore, për të marrë dhe për të përpunuar informacionin e vetëdeklarimit të taksapaguesit, për qëllim të zbatimit të legjislacionit përkatës të taksës mbi pasurinë e paluajtshme". Gazeta boton pikat e Ujësjellësit dhe oraret kur bëhet vetëdeklarimi i sipërfaqes. Qytetarët duhet të kenë me vete: 1. Kopje të ID
2. Certifikatën e Pronësisë me kartelën e pasurisë/ kontratë shitblerje, dhurimi ose shkëmbimi/ akt privatizimi apo vetëdeklarimi të ALUIZNI- t, rivlerësim të fundit të pasurisë nëse ka. 3. Librezën e ujit apo një faturë UKT. Sipas Ujësjellësit, vetëdeklarimi ka një afat. "Njoftojmë të gjithë konsumatorët që afati për plotësimin e formularit të vetëdeklarimit është deri në datën 15.09.2019!"
KUSH PËRJASHTOHET
Sipas njoftimit të UKT, përjashtohen nga taksa mbi ndërtesën:
- pasuritë e paluajtshme- ndërtesa, pronë e subjekteve juridike ose fizike, që në bazë të marrëveshjeve me bashkitë përdoren nga këto të fundit si banesa sociale;
- ndërtesat që përdoren nga komunitetet fetare, në funksion të veprimtarisë së tyre;
- ndërtesat e banimit, të deklaruara si vendbanim nga kryefamiljarët që përfitojnë vetëm pension pleqërie/ pension social, kur familja e tyre përbëhet vetëm nga pensionistë, ose dhe me persona në ngarkim të tyre, që janë të paaftë për punë;
- ndërtesat e banimit të kryefamiljarëve që trajtohen me ndihmë ekonomike;
Pra, kategoritë kryesore janë familjet me ndihmë ekonomike dhe pensionistët kryefamiljarë. Këta të fundit janë të njëjtët me ata që përfitojnë kompensim për energjinë elektrike. Për të përfituar duhet certifikatë familjare për të vërtetuar që janë kryefamiljarë të vetëm ose kanë persona të tjerë të familjes në moshë pune si dhe një deklaratë që plotësohet pranë sporteleve të ISSH. Verifikimi nëse pjesëtarët e tjerë të familjes janë të papunë punëkërkues bëhet nga ana jonë zyrtarisht në zyrat e punës. Pra, kush është pensionist me të ardhura vetëm nga pensioni, pra, me fëmijët ose të ndarë nga certifikata familjare, ose të papunë, apo kush është pensionist pa të ardhura të tjera, përfiton kompensim. Sipas Financave që hartuan ligjin, do të jetë ISSH që do t'u dërgojë bashkive listën me pensionistët që përfitojnë kompensim të energjisë dhe rrjedhimisht nuk paguajnë as taksën e shtëpisë në çdo bashki.
VERIFIKIMIT NË TERREN
Sipas njoftimit të UKT, njësitë e vetëqeverisjes vendore/ Agjenti Tatimor në përputhje me kompetencat e kuadrit ligjor në fuqi, kryejnë korrektime në regjistrin e bazës së të dhënave. Korrektimet kryhen bazuar në verifikimet periodike në terren për sipërfaqen e ndërtesës/ njësisë pronësore. Verifikimi në terren shërben edhe për të regjistruar për herë të parë ndërtesa/ njësi pronësore ose nënndarje të saj. Në këtë rast, njësitë e vetëqeverisjes vendore/ agjenti tatimor kërkojnë informacion nga burime zyrtare, nëse ka, për sipërfaqen e ndërtesës/ njësisë pronësore apo nënndarjen dhe e krahasojnë me verifikimin e kryer. Nëse nuk sigurojnë informacione lidhur me sipërfaqen e ndërtesave të identifikuara, njësitë e vetëqeverisjes vendore bëjnë vetëvlerësimin e ndërtesës/ njësisë pronësore mbi sipërfaqen e verifikuar në terren.
SIPËRFAQJA E PREZUMUAR
Ujësjellësi sqaron edhe çfarë ndodh nëse nuk ka të dhëna për sipërfaqen e shtëpisë. "Nëse identifikohet ekzistenca, por nuk arrihet të përcaktohet sipërfaqja e ndërtesës/ njësisë pronësore, përdoren vlerat referuese për sipërfaqe, si më poshtë vijojnë:
a) 100 ( njëqind) metër katror sipërfaqe për njësi pronësore, për ndërtesat për banim; ( të ndërtuara pas vitit 1993)
b) 70 ( shtatëdhjetë) metër katror sipërfaqe për njësi pronësore, për ndërtesat për banim, të privatizuara me ligjin nr. 7652, datë 23.12.1992, "Për privatizimin e banesave shtetërore", të ndryshuar. ( të ndërtuara para vitit 1993).