Zaptuan plazhin publik, hiqen 1 mijë shezlongë
Biznesmeni: Kam 10 vite që paguaj taksa, kam fituar gjyq
Sikur të mos mjaftonte numri i pakët i turistëve që frekuentojnë Ksamilin këtë verë, autoritetet shtetërore në pikën kulmore kanë nisur operacionin antiinformalitet.
Që në orët e para të së premtes, efektivë të Policisë së Shtetit dhe Policisë Bashkiake kanë zbarkuar te disa biznese që ofrojnë për pushuesit shezlongë. Gjatë operacionit, ku morën pjesë Drejtoria për Hetimin e Krimit Ekonomik e Financiar në Departamentin e Policisë Kriminale dhe Komisariati i Policisë Sarandë, me mbështetjen e Forcave të Ndërhyrjes së Shpejtë Fier, në bashkëpunim edhe me Bashkinë Sarandë, mësohet se është liruar një hapësirë prej 4000 metrash katrorë plazh që ishte zaptuar në mënyrë të kundërligjshme. Tre pronarë subjektesh janë proceduar penalisht, pasi ushtronin aktivitet në kundërshtim me ligjin dhe kishin zaptuar hapësirat publike në interes të tyre. Për këtë arsye, janë hequr nga Policia rreth 960 shezlongë, çadra e tavolina, duke iu kthyer hapësira e plazhit pushuesve. Por, biznesmenët thonë se disponojnë dokumentacion të rregullt dhe se Policia me këto ndërhyrje ka shkaktuar terror dhe panik ndaj familjeve të tyre. Flamur Pollo, një nga biznesmenët e proceduar penalisht, thotë se prej 10 vitesh ka kontratë për shfrytëzimin e hapësirës në breg të detit dhe përgjatë këtyre viteve ka qenë ndër taksapaguesit më të rregullt për detyrimet në institucione si edhe sinjalistikën detare, por edhe me rojën bregdetare. Çështja, sipas tij, ka nisur para dy vitesh kur në këtë pronë kanë ardhur autoritetet bashkiake duke kërkuar t'ia hiqnin nga përdorimi zonën e plazhit. "Flamuri është detyruar ta dërgojë çështjen në Gjykatën e Shkallës së Parë në Gjirokastër edhe Tiranë, vendimet e të cilave kanë qenë në favor të tij", thotë Servet Pollo, babai i Flamurit. Ai shton se punonjësit e Bashkisë së Sarandës nuk e marrin parasysh këtë gjë, por vijnë pa vendim edhe kërkesë, por mjaftohen vetëm duke ua komunikuar atë gojarisht. Ai u bën thirrje institucioneve edhe Kryeministrit të veprojnë sipas ligjit edhe rregullave e të mos godasin njerëzit e ndershëm, të cilët punojnë edhe janë taksapagues të rregullt të këtij vendi. Ndërkohë, sipas Policisë, Pollo ushtronte aktivitet pa lejen e Bashkisë, duke i bllokuar rreth 200 shezlongë, çadra e tavolina. Një tjetër biznesmeni iu bllokuan 600 shezlongë, çadra e tavolina, që përveçse nuk kishte leje nga Bashkia, nuk përdorte as kasë fiskale. Ndërsa një tjetër biznesmeni iu bllokuan 160 çadra, shezlongë e tavolina. Të tre biznesmenët do të hetohen për "Fshehje të të ardhurave" dhe "Pushtim i tokës". Pritet që operacioni të vijojë në gjithë zonën bregdetare.