PAGESA NE 32 ZONA
Pensionistët që shmangin taksën e re për shtëpinë
Tabela me llogaritjen e taksës së re të ndërtesës në të 32 zonat e Tiranës. Sa do paguhet për apartamentet para 1993 dhe pallatet e reja pas 1993. Çfarë ndodh me 130 mijë pensionistët që përfitojnë nga kompensimi i energjisë elektrike dhe tri kategoritë e tjera që nuk shmangin taksën. Dokumentet që duhen paraqitur deri më 16 shtator
Janë katër kategori që shmangin pagesën e taksë së re të pronës, që nis të aplikohet në Tiranë.
Drejtoria e Ujësjellësit, e cila ka bërë marrëveshje me bashkinë për mbledhjen e kësaj takse, ka qartësuar se krahas banesave sociale dhe objekteve të kultit, nuk do të paguajnë taksën "ndërtesat e banimit, të deklaruara si vendbanim nga kryefamiljarët që përfitojnë vetëm pension pleqërie/ pension social, kur familja e tyre përbëhet vetëm nga pensionistë, ose dhe me persona në ngarkim të tyre, që janë të paaftë për punë; ndërtesat e banimit të kryefamiljarëve që trajtohen me ndihmë ekonomike". Këto janë dy kategori, për të cilat qeveria kompenson edhe energjinë elektrike. Një vit më parë, kur u aprovua taksa dhe mënyra e mbledhjes së saj, Ministria e Financave udhëzoi ISSH, që të dërgonte pranë bashkive listat me kryefamiljarët pensionistë, të cilët nuk do të paguajnë taksën për shtëpisë. Në të gjithë vendin, sot marrin kompensim 640 lekë për energjinë elektrike rreth 130 mijë pensionistë. Kuptohet që shumica prej tyre jetojnë në Tiranë. Sipas UKT, të gjithë konsumatorët, pra, kryefamiljarët, në emër të të cilëve është banesa, kanë afat deri më datën 15.09.2019 për plotësimin e formularit të vetëdeklarimit në pikat e Ujësjellësit të Tiranës në çdo lagje. Gazeta boton sot edhe formularin për të përfituar kompensimin e dritave dhe si rrjedhojë edhe kompensimin ( mospagesën) e të gjithë taksës së shtëpisë. Kushtet për të përfituar janë të thjeshta. Duhet që fatura të jetë në emër të kryefamiljarit, në këtë rast edhe tapia e shtëpisë, duhet që të vërtetohet se asnjë nga familjarët që janë të shënuar në certifikatën familjare, nuk janë në punë. Kush plotëson këto kushte, merr 640 lekë kompensim për energjinë elektrike në muaj dhe nuk paguan taksën e shtëpisë. Por sa është kjo e fundit?
TAKSA E SHTËPISË DHE GARAZHEVE
Taksa e shtëpisë është miratuar vjet. Më parë, taksimi për apartamentet ka qenë fiks 30 lekë për m2 për shtëpitë pas 1993 dhe 15 lekë për metër katrorë për shtëpitë para ' 93 ose pallatet e vjetra. Vjet, qeveria ndryshoi formulën dhe vendosi të taksojë sipas vlerës, jo me çmim fiks. Duke qenë se në Tiranë çmimet e apartamenteve variojnë sipas zonave, edhe taksa ndryshon sipas zonave. Sa më i shtrenjtë vendi ku është shtëpia, aq më e lartë taksa. Sa më e madhe shtëpia, aq më e lartë taksa. Gazeta boton sot llogaritjet e taksës për çdo zonë të Tiranës. Si për shtëpitë, ashtu edhe për garazhet apo bizneset. Sipas ligjit, taksa për shtëpitë do të jetë sa 0,05 për qind e vlerës së saj, e llogaritur sipas çmimeve fiskale, ndërsa për biznesin sa 0,2 për qind e vlerës fiskale të dyqanit apo sipërfaqes tjetër ku bëhet aktiviteti. Ligji parashikon diferencim për apartamentet e ndërtuara para 1993 të privatizuarA nga qytetarët me çmime simbolike. Për këto kategori, çmimi për metër katror është 70 për qind e çmimit, sipas zonave ku ndodhet apartamenti, vetëm në rastin e shitjes së parë. Pra, e thënë ndryshe, në rast se ky apartament nuk është shitur apo blerë asnjëherë, çmimi për llogaritjen e taksës do të jetë me 30 për qind më pak. Gazeta zbardh tabelën sa do paguhet në Tiranë, ndarë sipas zonave, apartamenteve para dhe pas vitit ' 93, si dhe bizneset e garazhet.