Zgjedhjet më 13 tetor, dështon mbledhja, e majta bojkoton KQZ- në
Klement Zguri: Nuk ka kuorum, kolegët me pushime, do të dëshiroja që ne zyrtarisht përmes një vendimi të kishim një përgjigje
Komisioni Qendror i Zgjedhjeve nuk mundi t’i jepte një përgjigje dje kërkesës së tri partive opozitare për nisjen e përgatitjeve për zgjedhjet e 13 tetorit sipas dekretit të Presidentit Meta.
Anëtarët e KQZ- së, të propozuar nga e maxhoranca parlamentare, nuk morën pjesë në mbledhjen e djeshme të thirrur nga kryetari i KQZ- së, Klement Zguri, me justifikimin se ata kanë nisur pushimet verore pas certifikimit të rezultatit të zgjedhjeve të 30 qershorit. Vetëm kryetari i KQZ- së, Klement Zguri, ishte i pranishëm në sallën e mbledhjeve të KQZ- së, ku në tavolinë ishte shqyrtimi i kërkesës së aleatëve të PD- së: Partia Agrare Ambientaliste ( PAA), Partia Republikane ( PR) dhe Lëvizja Socialiste për Integrim ( LSI). Të tjerët, Denar Biba, Bledar Skënderi, Edlira Jorgaci, Rezarta Bitri, janë me pushime. Administrata u shpreh se janë me leje të zakonshme. Ata kishin paralajmëruar një ditë më parë se nuk do të merrnin pjesë në mbledhjen e thirrur nga kryetari i KQZ- së. I gjendur në vështirësi, Zguri nuk e fshehu pozicionin e pazakontë të tij, kur vetëm ai ishte i pranishëm, dhe kërkoi ndjesë para mediave. “Thjesht në respekt dhe në detyrim të kompetencave të mia si drejtues i institucionit, thërrita mbledhjen që të jetë KQZ- ja ajo që të japë një përgjigje. Nuk jam unë, edhe pse jam kryetar i KQZ- së, prandaj thashë nuk kam mundësi ta marr vendimin. Do të doja dhe dëshiroja që ne zyrtarisht përmes një vendimi të kishim një përgjigje. Kolegët, sipas sekretarit të Përgjithshëm, qenkan me leje, nuk janë disponibël. Për këtë shkak, mbledhja nuk mund të hapet. Unë kërkoj ndjesë. Nëse do kemi mbledhje tjetër, jam i papërcaktuar për sa kohë kolegët janë me leje dhe nuk janë këtu. Mbledhja, e përsëris, nuk mund të hapet, pasi mungon kuorumi”, tha Zguri, duke e mbyllur në këtë mënyrë mbledhjen.
KËRKESA Tri parti të koalicionit opozitar iu drejtuan KQZ- së me kërkesën për fillimin e procedurave për zgjedhjet për organet e qeverisjes vendore të datës 13.10.2019. Sipas PR, PAA dhe LSI, baza ligjore e kësaj kërkese është dekreti i Presidentit të Republikës nr. 11 211, datë 27.6.2019 “Për caktimin e datës së zgjedhjeve për organet e qeverisjes vendore”. Sipas tyre, ka rezultuar tashmë qartë se data 30 qershor 2019 nuk konsiderohet datë ligjore zgjedhjesh për organet e qeverisjes vendore, pasi Presidenti i Republikës, me dekretin nr. 11 199, datë 10.6.2019 “Për shfuqizimin e dekretit nr. 10928, datë 5.11.2018 të Presidentit të Republikës “Për caktimin e datës së zgjedhjeve për organet e qeverisjes vendore”, shfuqizoi datën 30 qershor 2019, si datë për zhvillimin e zgjedhjeve për organet e qeverisjes vendore. Të hënën pas mesnate përfundon afati ligjor për regjistrimin e partive politike në KQZ për zgjedhjet e 13 tetorit. Pavarësisht dështimit të parë të mbledhjes së KQZ- së, aleatët e Lulzim Bashës pritet që me 5 gusht të dorëzojnë kërkesën për regjistrim.
LSI Përfaqësuesi ligjor i LSI- së në KQZ, Muharrem Caka, e ka quajtur veprimin e 4 anëtarëve të qëllimshëm, me urdhër politik. “Patjetër është e qëllimtë dhe me orientim të qartë politik. A janë të bindur anëtarët e KQZ- së që e kanë përmbushur detyrimin solemn të tyre?! Në nenin 13, pika 4, të Kodit Zgjedhor parashikohet se përpara fillimit të detyrës, anëtari i zgjedhur i KQZ- së kryen betimin përpara Kuvendit, në një ceremoni publike dhe në formulën e betimit deklaron: “Betohem në nderin tim se do të angazhohem me të gjitha forcat e mia për realizimin e forcave të drejta, të lira dhe demokratike në Republikën e Shqipërisë, do të siguroj dhe do të mbroj integritetin dhe fshehtësinë e votës. Do të ruaj paanësinë në kryerjen e detyrës si anëtar i KQZ- së dhe do të tregoj profesionalizëm në kryerjen e saj”, u shpreh Caka. Sipas tij, dekreti i Presidentit dhe Kushtetuta prevalon mbi lejet e zakonshme. “Dekreti i Presidentit të Republikës është në fuqi dhe ne do të respektojmë të gjitha parashikimet e Kodit Zgjedhor. Do të marrim të gjithë hapat ligjorë që parashikon Kushtetuta dhe Kodi Zgjedhor. Ftojmë anëtarët të respektojnë detyrimet e tyre. Prevalon Kushtetuta mbi lejen vjetore”, u shpreh përfaqësuesi i LSI- së në KQZ, Muharrem Caka.