Kryebashkiaku Pjetri: Do të flas pas verifikimeve të Prokurorisë
Kryebashkiaku i Shkodrës, Valdrin Pjetri, i zgjedhur në 30 qershor, reagoi dje ndaj akuzave të bëra dy ditë më parë nga Partia Demokratike, e cila iu drejtua me një kërkesë Prokurorisë së Përgjithshme që të verifikonte pastërtinë e figurës së tij, pasi, sipas PD- së, Pjetri nuk mund të kandidojë, për shkak se ka qenë i ndaluar dhe i dëbuar nga Italia. “U njoha nëpërmjet kërkesës së z. Bardhi, i cili bazohet dhe firmos mbi ‘ indicie publike’. Sigurisht që jam shumë i hapur mbi çdo verifikim timinm por jo mbi ‘ indicie publike’. Askush më mirë se institucioni i Prokurorisë së Përgjithshme nuk mund t’i kthejë përgjigje kërkesës së z. Bardhi dhe çdo personi tjetër të interesuar apo kurioz. Pasi institucioni i ngarkuar nga ligji për të kryer verifikimet e kërkuara të ketë kthyer zyrtarisht përgjigje, nga ana ime do të ketë një prononcim publik mbi këtë kërkesë të z. Bardhi të bërë në emër të Partisë Demokratike”, është shprehur Pjetri për mediat. Dy ditë më parë, përmes një kërkese të firmosur nga sekretari i përgjithshëm, Gazment Bardhi, PD i kërkoi Prokurorisë së Përgjithshme të verifikonte figurën e Valdrin Pjetrit, pasi, siç thuhej në kërkesë, ekzistojnë të dhëna, indicie dhe dëshmi publike se socialisti nuk mund të ushtrojë funksion publik, për shkak të ligjit të dekriminalizimit. “Në vitin 2001- 2002, Valdrin Pjetri ka qenë i arrestuar/ ndaluar në Itali ( ka jetuar në Firence, Itali) dhe, më pas, ndaj tij është marrë masa e dëbimit nga autoritetet përgjegjëse italiane. Nga verifikimi i të dhënave të sistemit TIMS rezulton se shtetasi Valdrin Pjetri nga periudha 2002 – 23.3.2010 nuk ka udhëtuar në asnjë rast të vetëm në drejtim të Italisë, çka përbën një indicie për saktësinë e të dhënave të bëra publike më parë”, thuhet ndër të tjera në letrën e Bardhit.