Në përgjime me Avdylajt, bëhet kryetar i Këshillit Bashkiak
Personat e dalë në përgjimet e publikuara nga “Bild” vijojnë të promovohen në poste publike. Ditën e premte, më 2 gusht, në Bashkinë e Durrësit u bë rotacioni i drejtimit nga Vangjush Dako te Valbona Sako. Në këtë mbledhje ishte i pranishëm vetë Dako, i cili ia kaloi stafetën kryetares së re të Bashkisë të qytetit bregdetar. Por, përpara se të ndodhte ky ceremonial, në Bashkinë e Durrësit u ngrit Këshilli i ri Bashkiak i dalë nga zgjedhjet e 30 qershorit ku kryetar u zgjodh Ani Dyrmishi. Por, emri i këtij të fundit nuk është i panjohur. Ai del në përgjimet që publikoi në muajin qershor gazeta gjermane “Bild” mes Astrit Avdylajt, kreut të grupit të Shijakut dhe ish- kryebashkiakut të Durrësit, Vangjush Dako. Për këtë çështje, “Bild” shkroi: “Nga biseda del se Astrit Avdylaj ndodhet në Zyrën e Regjistrimit të Pasurive në Durrës, në praninë e drejtorit të Zyrës dhe Vath Allës, një ish- i dënuar për vrasje për të ‘ mbaruar’ një punë për llogari të Allës. Ai i thotë Dakos që të anulojë planet e tij për të udhëtuar në Ishëm, për të siguruar që ‘ puna’ që Alla po kërkon, të përfundohet te Zyra e Hipotekës nga drejtori që telefonon Anin dhe më pas Dakon për t’u takuar me të dhe me të dënuarin për vrasje, Vath Alla. Kryebashkiaku Dako pranon dhe ndryshon axhendën”. Me sa duket, personat e dalë nga këto përgjime si persona që kanë lidhje me bandën e Shijakut, vazhdojnë karrierën e tyre politike. Dyrmishi, në kohën kur ka dalë përgjimi, ishte drejtor i Zyrës Vendore të Regjistrimit të Pasurive të Paluajtshme në Durrës ( Hipoteka). Pas kësaj detyre ai u bë drejtor i Hekurudhës Shqiptare, post të cilin e mori pas zgjedhjeve të vitit 2017, kur PS në Durrës mori rezultat të lartë. Tanimë, Dyrmishi ka edhe detyrën e kryetarit të Këshillit Bashkiak të Durrësit, duke pasur dy funksione publike.