Ra nga 100 metra lartësi, gjendet i vdekur 64- vjeçari

GJIROKASTËR – Policia e Gjirokastrës pasditen e së shtunës u njoftua nga banorë të zonës për praninë e një trupi të pajetë në përroin e Dunavatit. Trupi u nxor pas gati dy orësh dhe mësohet se viktima është Bujar Gjashta, 64 vjeç. I moshuari nga Tirana kishte shkuar për vizitë në Gjirokastër dy ditë më parë dhe më pas nuk dihej fati i tij. Familjarët për këtë arsye bënë dhe denoncim në Polici, duke e deklaruar të humbur. Dyshohet se 64- vjeçari mund të ketë rënë nga një lartësi prej gati 100 metrash në zonën muzeale të qytetit të Gjirokastrës. Për shkak të terrenit të vështirë, efektivëve të Komisariatit të Policisë Gjirokastër iu deshën disa orë për të nxjerrë nga përroi trupin e viktimës. Kanë qenë banorë të zonës ata që kanë parë trupin në ujë dhe më pas kanë vënë në dijeni Policinë për këtë fakt. Familjarët e 64- vjeçarit mësohet se kanë deklaruar gjatë denoncimit si të humbur të të dashurit të tyre se Bujar Gjashta kishte shkuar për të vizituar Kalanë e Gjirokastrës gjatë ditës së premte, por nuk ishte kthyer më në shtëpi. Pritet që të kryhet ekspertiza mjekoligjore për të përcaktuar shkakun e vdekjes së 64- vjeçarit. Dyshohet se Gjashta mund të ketë rënë aksidentalisht nga ndonjë pakujdesi, por gjithashtu nuk përjashtohet as pista që i moshuari të ketë kryer akt vetëvrasjeje. 64- vjeçari për shumë vite ka ushtruar profesionin e avokatit, ndërsa kohët e fundit kishte shfaqur probleme të shëndetit mendor. Kjo është dhe arsyeja që, pista kryesore e hetimit është ajo e vetëvrasjes.