Konkursi për punësim, hapen aplikimet për infermierët
Infermierët që kanë marrë licencën, por ende nuk kanë gjetur një vend pune, kanë rreth dhjetë ditë afat për të aplikuar për vendet vakante që pritet të krijohen në spitalet e vendit. Ministria e Shëndetësisë ka hapur thirrjen për dorëzimin e dokumenteve, që vlen deri në datën 15 gusht. Për të siguruar një vend pune, garuesit do të duhet të kalojnë në dy "sita". Së pari, është faza aktuale, dosja personale, që konsiston në vlerësimin e arsimimit, përvojës e trajnimeve dhe më pas testimi i informatizuar, pjesëmarrja në të cilin ka si kusht kalimin me sukses të fazës së parë. Ky është viti i dytë i punësimit përmes "Infermierë për Shqipërinë", një portal i ngjashëm me atë për mësuesit, përmes të cilit synohet punësimi i drejtpërdrejtë i më të mirëve, duke shmangur burokracitë në shkolla e spitale. Provimi ka peshën më të madhe të vlerësimit, për shkak se përmban 70 pikë, ndërsa 30 pikët e tjera fitohen nga vlerësimi i dosjes. Testimi digjital, që kryhet pranë Qendrës së Shërbimeve Arsimore, do të jetë i ngjashëm me provimin e licencës, të cilin kandidatët e kanë kaluar një herë. Ai do të jetë me alternativa, me pyetje të ndara në dy pjesë. Në të parën përfshihen pikëpyetje rreth akteve ligjore ku futen Kodi Etik- Deontologji, ligji për kujdesin shëndetësor dhe ai për Urdhrin e Infermierit. Ndërsa pjesa e dytë është me pyetje të dedikuara tërësisht rreth profesionit. Ndërsa deri në gjysmë të këtij muaji parashikohet marrja e dosjeve, vlerësimi tyre duhet të përfundojë deri në fundin e gushtit. Nga 1 shtatori, pritet të dalin emrat e kandidatëve që kualifikohen për fazën e dytë bashkë me pikët e grumbulluara në vlerësimin e dosjes. Komisioni që bën vlerësimin e dosjes personale, ofron edhe formularin që lejon kandidatët të garojnë në testim.