Dopietë e Sindrit Gurit, Lenjani gol fantastik

Mesfushori shënon nga distanca në Zvicër, shtang portierin

Shqiptarët nisin sezonet me skuadrat e tyre, duke qenë protagonistë.

Ermir Lenjani ka realizuar dje një eurogol për Sionin, ndërkohë që Sindrit Guri ka qenë protagonisti kryesor në fitoren e Ostendes përballë skuadrës së Sersle Bryzh me dopietë dhe një ndikim të autogolit të mbrojtësit kundërshtar. Thuajse një muaj nga ndeshja e radhës me Francën në transfertë me kombëtaren, futbollistët kuqezi po japin shenja se gëzojnë një formë të mirë.

DOPIETA

Në Belgjikë luhet java e dytë e kampionatit vendës dhe Sindrit Guri e ka nisur në mënyrën më të mirë këtë vit. Pasi shënoi në miqësoret e verës, sulmuesi shkodran gjeti rrugën e rrjetës edhe në ndeshjet zyrtare, duke i dhënë Ostendes pikë të rëndësishme në këtë start të sezonit. Në takimin e javës së dytë që Ostende luajti në shtëpi përballë Sersle Bryzh, sulmuesi i Kombëtares ishte protagonisti kryesor me paraqitjen e tij. Miqtë kishin kaluar në avantazh që në minutën e 7- të, por ishte Guri që shënoi në të 32tën. Shkodrani kërceu me kokë, pas një krosimi nga e djathta dhe ia doli të çojë topin në fundin e rrjetës, barazim i përkohshëm dhe pak minuta më vonë, goli tjetër i Ostendes do të vinte sërish me shqiptarin protagonist. Vetëm pas 8 minutash, Guri, gjatë një goditjeje këndi, detyroi mbrojtësin Sadi të miqve që të çonte topin në rrjetën e tij. Guri nuk u ndal dhe "hipotekoi" fitoren për Ostenden, teksa shënoi edhe golin e tretë të ekipit. Në minutën e 87- të, pasi mori një top nga e majta, shkodrani kaloi një mbrojtës në duel shpejtësie dhe në një kundërsulm "vrasës". Më tej, sulmuesi i Kombëtares e çoi topin pas shpinës së portierit, duke siguruar 3 pikët për ekipin e tij.

ZVICËR

Superliga zvicerane luan javën e saj të tretë dhe ekipi i Sionit përballet në shtëpi me Zyrihun. Takimi ka nisur menjëherë me gol, që në minutën e 8- të, të shënuar pikërisht nga lojtari i Kombëtares, Ermir Lenjani. Pas një kundërsulmi të shpejtë nga ekipi i Sionit, ishte Fortune që ktheu pak mbrapa topin te Lenjani. Ky i fundit u mendua se do të krosonte në zonë, por e çoi topin drejt e në portë, duke shtangur portierin kundërshtar e duke i dhënë avantazhin Sionit me një eurogol. Më tej, Kollolli ka humbur penallti, ndërkohë që Kasami ka shënuar dopietë në fitoren 3- 1 të Sionit përballë Zyrihut. Formë e shkëlqyer e mesfushorit kuqezi që po tregohet vendimtar me Sionin në këtë start sezoni, duke qenë në ndihmë edhe për fazën mbrojtëse, por mbi të gjitha me gola të bukur nga distanca.