Basha: Rama gjobit bizneset e vogla dhe pasurohet vetë
“Pasuria e tij 6 vjet më parë ishte 200 milionë euro, po sot?!”
Kreu i opozitës, Lulzim Basha, dënoi dhunën e gjobave ndaj bizneseve të vogla, me të cilat mbijeton shumica e familjeve shqiptare. Në një takim me strukturat e PD- së në Belsh, Basha tha se dhuna e tatimorëve ndaj biznesit të vogël bëhet për të financuar grykësinë dhe luksin e Edi Ramës me disa klientë të tij milionerë: “Rama është sponsorizuesi dhe përfituesi kryesor i informalitetit. Ai kaloi ligjet që favorizojnë klientët dhe oligarkët e tij, ndërkohë që rëndon me taksa, tarifa dhe gjoba sipërmarrjet e vogla dhe të mesme”. Kreu i opozitës tha se keqtrajtimi i biznesit të vogël ishte një nga arsyet pse njerëzit e braktisën Ramën më 30 qershor, duke e kuptuar se ato votime nuk ishin në interes të qytetarëve, por për të thelluar hajdutërinë, grabitjen dhe babëzinë e Edi Ramës, që janë sot aktiviteti i vetëm politik dhe ekonomik i tij. “Vetëm këtë javë, nga tenderi korruptiv për uniformat e policisë, 15 milionë euro zhduken në xhepat e Edi Ramës dhe bashkëpunëtorëve të tij. Nga tenderi korruptiv monopolist për sistemin e ri të faturimit të biznesit, që nxjerr jashtë përdorimit kasat fiskale, i shtojnë me ligj një taksë të re deri në 100 euro biznesit. Këtë po e bën një kompani fantazmë, gjoja kroate, por, në fakt, është kompania e këshilltarit kroat të Edi Ramës dhe paratë do të ndahen me familjarët e Kryeministrit”, u shpreh Basha. Duke iu referuar edhe ligjeve dhe vendimeve speciale për grabitjen e Teatrit dhe të Kopshtit Botanik për të ndërtuar kulla, Basha u shpreh se politika e vetme e hajdutit psikik në krye të qeverisë është grabitja për pasurimin e pandalshëm. “Në qoftë se para 6 vjetësh raporti i OSBE- së thoshte që ka 200 milionë euro pasuri, akoma pa u ulur në karrigen e Kryeministrit, imagjinoni tani! Tani është vërsulur me shpejtësi që t’i bëjë të gjitha këto grabitje të mëdha menjëherë, pasi e ndien që po afron ora e fundit”, tha Basha. Nga Fushë- Arrëzi Basha tha se Partia Demokratike me aleatët e saj është fituese e zgjedhjeve të lira e të ndershme, kurdo që të mbahen ato. Basha deklaroi se 30 qershori e vërtetoi këtë, duke i bashkuar shqiptarët krah opozitës kundër bandës së Rilindjes në pushtet. “Përmes 6 muajsh protestash i kemi dhënë kurajë çdo shqiptari, kemi vetëdijesuar çdo shqiptar dhe sot, pas 30 qershorit, nuk janë vetëm sondazhet ato që tregojnë PD dhe aleatët fitues të zgjedhjeve të ardhshme, të lira e të ndershme, kurdo që të mbahen ato, por është vetë përmasa e 30 qershorit”, tha Basha.