Tabaku: Qeveria, propagandë për të mbuluar aferat korruptive
Ish- deputetja e Partisë Demokratike, Jorida Tabaku, akuzoi dje qeverinë se po bën propagandë justifikuese. Ajo akuzoi maxhorancën se ka kapur institucionin e hetimit dhe sërish bën propagandë. Tabaku nxori dje disa të dhëna për koncesionet e qeverisë, ku theksoi se ato janë fryrë me qëllim që të përvetësohen, ndërkohë që nuk ka asnjë hetim nga Prokuroria. “Episodet humoristike të qeverisë Rama nuk lidhen vetëm me mënyrën e paraqitjes së Kryeministrit në takimet zyrtare apo konferencat. Ato shpesh zbresin edhe në zyrat e Kryeministrisë, ku anëtarë të qeverisë, për të mbuluar koncesionet abuzive dhe kriminale, ngrenë gishtin akuzues ndaj atyre që i akuzojnë. Një situatë e tillë qesharake vjen, pasi qeveria Rama ka 6 vjet në qeverisje, ka marrë në dorë Prokurorinë e Përgjithshme përmes shpikjes PPP Marku, Prokurorinë e Krimeve të Rënda dhe çdo institucion tjetër hetues në vend. Me gjithë këtë pushtet në dorë, me të gjitha mundësitë për të hetuar këdo nga qeveritë e shkuara, qeveria Rama zgjedh prapë gënjeshtrën propagandistike. Ironia është se në vend që të hetohen ata që e ndanë Shqipërinë me traun 5 eurosh për interesa meskine, ftohen të linçohen me akuza të dala boje ata që e bashkuan shqiptarinë. Heshtet për qeverinë dhe ministrat që kanë dhënë 2,2 miliardë lekë PPP për rrugë e shërbime, që ende nuk kanë përfunduar dhe që i është fryrë kosto mbi dhjetë herë, ndërkohë që nuk janë dëgjuar të flasin kundër kontratave abuzive koncesionare të rrugës Milot- Balldren me vlerë 296 milionë euro dhe PPP- në e rrugës Porti i Jahteve- Orikum me vlerë 70 milionë euro”, theksoi Tabaku.