Falsifikonin dokumente për kalim të paligjshëm, pranga 4 personave
Siguronin dokumente të falsifikuara për kalim të paligjshëm të kufirit, arrestohen katër persona. Policia e Tiranës njoftoi dje se në kuadër të operacionit "DEPARTURE" vuri në pranga organizatorin e grupit, i cili siguronte karta italiane të falsifikuara dhe kundrejt shumave të konsiderueshme në euro siguronte kalimin për në vendet e BE- së, me destinacion final Anglinë. Në pranga për këtë veprimtari u arrestuan edhe 3 shtetas të tjerë për falsifikim të dokumenteve, që i kishte marrë përsipër organizatori i grupit. "Organizatorët e kësaj veprimtarie kriminale janë kapur nga Policia Kufitare me dokumente italiane të falsifikuara dhe konkretisht, karta identiteti dhe karta shëndeti, të cilat do t'i përdornin pasi të kalonin kufirin nga Shqipëria në drejtim të BE- së, për të hyrë më pas ilegalisht në Mbretërinë e Bashkuar", njoftoi dje Policia. Duke iu referuar Policisë, bëhet e ditur se në cilësinë e provës materiale u sekuestruan 4 karta identiteti italiane dhe 5 karta shëndeti italiane të dyshuara si të falsifikuara, 4 aparate celularë, 3 pasaporta shqiptare, 1 pasaportë italiane, 1 leje drejtimi italiane, 4 Boarding Pass me destinacion TiranëLubjanë, 4 Boarding Pass me destinacion Lubjanë- Paris. "Operacioni vijon në bashkëpunim me Prokurorinë e Rrethit Gjyqësor Tiranë për identifikimin dhe kapjen e personave të tjerë të implikuar në këtë veprimtari të kundërligjshme", bëri të ditur Policia.
ARRESTIMET Personat e arrestuar janë ndaluar në flagrancë nga specialistët për Hetimin e Trafiqeve të Paligjshme, në Drejtorinë Vendore të Policisë Tiranë. Në pranga kanë rënë: shtetasi I. B., 29 vjeç, lindur në Durrës dhe banues në Itali, si i dyshuar për kryerjen e veprave penale "Ndihma për kalim të paligjshëm" dhe "Falsifikimi i letërnjoftimeve i pasaportave ose i vizave", i cilësuar si organizatori; A. C., 19 vjeç, banues në Koplik, Shkodër, i dyshuar për kryerjen e veprave penale "Ndihma për kalim të paligjshëm" dhe "Falsifikimi i letërnjoftimeve i pasaportave ose i vizave". Këtij shtetasi iu gjetën në çantë kartat e identitetit italiane dhe kartat e shëndetit italiane të falsifikuara; F. L., 25 vjeç, banues në Durrës, i dyshuar për kryerjen e veprës penale "Falsifikimi i letërnjoftimeve i pasaportave ose i vizave"; dhe K. A., 30 vjeç, banues në Durrës, i dyshuar për kryerjen e veprës penale "Falsifikimi i letërnjoftimeve i pasaportave ose i vizave".