Kukësi- Partizani në start, klubet do të "shtrydhen"

Presidenti i Ligës, Libohova: Qeveria do të akordojë fonde

Java e parë e kampionatit të 81- të do të hapet me një duel titulli, teksa Kukësi do të presë në shtëpi kampionët e Partizanit. Duel interesant që në start është edhe ai mes Skënderbeut dhe Flamurtarit, ndërsa Tirana do të presë Luftëtarin në shtëpi. Derbi i kryeqytetit do të luhet në javën e gjashtë, më 28 shtator. Ajo që bie më së shumti në sy, është fakti që skuadrat do të luajnë në harkun e 7 ditëve tri ndeshje. Kampionati do të nisë më 24 gusht dhe java e dytë luhet më 28 gusht, ndërsa e treta më 1 shtator. Një sforco shumë e madhe për klubet që në nisje. Sezoni është programuar të mbyllet më 23 maj të vitit 2020. Të pranishëm dje kanë qenë përfaqësues të disa prej klubeve kryesore, por ka pasur edhe nga ato klube që kanë preferuar të mos dërgojnë një zyrtar gjatë shortit, siç ishin Flamurtari, Teuta, Bylisi. QEVERIA DO TË JAPË LEKË PËR FUTBOLLIN

Ishte një deklaratë surprizë e Edvin Libohovës, presidentit të Ligës Profesioniste dhe njëherazi zv. president i FSHFsë. Pas hedhjes së shortit ai komentoi situatën e rëndë financiare që po kalon futbolli dhe mes rreshtave tha se duke filluar nga shtatori, jo vetëm që do të jenë në pritje të miratimit të ligjit për sponsorizimet në sport, por shtoi se futbolli do të përfitojë para. Libohova saktësoi se do të përfitojnë vetëm ato klube që i kanë bilancet në rregull dhe se qeveria gjithashtu mund të amnistojë klubet nga kamatëvonesat e detyrimeve. Ai deklaroi gjithashtu se së shpejti do të shitet edhe emri i Kategorisë Superiore dhe të ardhurat do t'u shkojnë klubeve. "Zoti Rama premtoi se në shtator ky ligj do të diskutohet, ndërkohë do të përgatitemi që ekipet të jenë të gatshme për të mundësuar thithjen e fondeve që do të akordohen në kuadër të ligjit të ri të sporteve, sepse duhet formalizim, duhet organizim më i mirë i klubeve. Kjo, sepse ligji për sportet dhe ndryshimet që do të bëhen, do të kenë kritere, do të kenë procedura dhe jo kushdo mund t'i plotësojë. Kështu që, ne do të përgatitemi në krahun tjetër për të qenë të gatshëm dhe të kemi mundësi t'i thithim këto fonde për Ligën, përfshirë këtu edhe emrin e Ligës... Po mendojmë shitjen e emrit të Ligës", deklaroi Libohova. KLUBET ME PROBLEME

FSHF pati paralajmëruar katër klube, për shkak të situatës financiare. Bëhej fjalë për Tiranën, Vllazninë, Flamurtarin dhe Luftëtarin. Afati i fundit që ato të gjenin një marrëveshje për detyrimet që kishin në Tatime apo ndaj palëve të tjera, ishte lënë 31 korriku. Të katër këto klube morën pjesë në short dje, por FSHF- ja nuk ka saktësuar se cilat kritere plotësuan këto klube dhe çfarë duhet të bëjnë ende për të mos pasur probleme gjatë sezonit. "Përderisa janë në short, do të thotë që Komisioni i Licencimit ka bërë punën e vet dhe ka konstatuar që janë konform kërkesave për të marrë pjesë në Superiore", deklaroi shkurt Libohova.