Ngrijnë tapitë e pronave me 7501, ligji në Venecia

Projektligji që do mbyllte procesin e ndarjes së tokës, legalizimeve dhe oborreve në përdorim, shkon në Komisionin e Venecias. Pse u pezulluan tapitë

Procesi për përfundimin e hipotekimit të pronave të ndara me ligjin 7501, dhe jo vetëm, ka ngrirë.

Projektligji “Për përfundimin e proceseve kalimtare të pronësisë në Republikën e Shqipërisë” u miratua në Komisionet Parlamentare në fillim të këtij viti, por nuk u miratua në seancë plenare për shkak të interesimit që kishin pasur deputetët për këtë nismë. Drafti kishte 7 muaj që flinte në sirtarët e Kuvendit dhe pritej që të miratohej në fillim të shtatorit, kur do të rinisë edhe sesioni i ri parlamentar. Por ky draft, i cili është cilësuar si zgjidhësi i problemit të pronësisë në vend, ka vajtur për shqyrtim në Komisionin e Venecias dhe për rrjedhojë, deri në paraqitjen e opinionit nga ana e tyre, drafti nuk do të miratohet nga Parlamenti dhe për rrjedhojë nuk do të miratohen dot ndryshimet ligjore që thjeshtëzonin procedurën për pajisjen me certifikatë pronësie të tokave të marra në përdorim sipas ligjit 7501. LIGJI

Ligji, i cili ka vajtur për shqyrtim në Komisionin e Venecias, trajton disa problematika të pronësisë që nga pajisa me certifikatë pronësie të tokave të ndara me ligjin 7501, hipotekimin e oborreve në përdorim, legalizimin e banesave etj. Në raportin e miratuar nga Komisioni i Ligjeve për këtë nismë parashikohet se: “Qëllimi i këtij projektligji është krijimi i bazës ligjore të thjeshtuar dhe të harmonizuar për përfundimin e proceseve administrative të trajtimit të pronës së paluajtshme të shtetit dhe të pronës private, duke përcaktuar rregullat për ligjësimin e titujve të pronësisë së dhënë, sipas akteve ligjore dhe nënligjore për tokën bujqësore; Për ligjësimin dhe regjistrimin në regjistrin publik të pasurive të paluajtshme për ndërtimet pa leje, objektet dhe trojet funksionale, kur mungojnë aktet e fitimit të pronësisë, si dhe për oborret në përdorim; Për rregullimin e marrëdhënieve të pronësisë në territoret e cilësuara si “zona të stimuluara me përparësi zhvillimin e turizmit”; Për inventarizimin e përditësimin e pronave të paluajtshme të qeverisjes qendrore dhe vendore, si dhe transferimin e tyre; Për kalimin e së drejtës së pronësisë mbi trojet e paprivatizuara të ndërtesave të privatizuara, të ndërtesave të shitura nga ndërmarrjet shtetërore dhe të ngritura në bazë të lejeve të ndërtimit, pas datës 10.8.1991, si dhe trojet e objekteve apo ndërtesave, ish- pronë e ishkooperativave bujqësore; Për trajtimin ligjor të problemeve të krijuara si pasojë e gabimeve materiale, të parregullsive në zbatimin ligjit; Për harmonizimin e proceseve kalimtare me procesin e trajtimit të pronës, me ligjin nr. 133/ 2015, “Për trajtimin e pronës dhe përfundimin e procesit të kompensimit të pronave”. Synimet e projektligjit kanë të bëjnë me reformimin në thelb të proceseve të lartpërmendura, duke parashikuar normat e nevojshme për zgjidhjen e problematikave që kanë shoqëruar zbatimin e tyre, në funksion të përmbylljes së çështjes së pronës”.