Aksioni kundër informalitetit, Rama: Zero tolerancë për këdo që bën karshillëk me ligjin
Edhe zv. kryeministri, qëndrim për aksionin: Pronarët të mos kërcënojnë inspektorët, asnjë telefon nuk ju ndihmon dot
Zero tolerancë ndaj kujtdo ndër këta, që i bëjnë karshillëk ligjit, shtetit, konsumatorit. Qasja sensibilizuese, edukative, tolerante për të mos stresuar biznesin u zgjat shumë dhe prodhoi pak sukses për kohën që mori
Qeveria shqiptare vijoi dje me publikimin e rezultateve të aksionit kundër informalitetit. Kryeministri Rama dhe zëvendësi i tij, Erion Braçe, dhanë mesazhet e tyre ndaj kësaj nisme të qeverisë.
Kreu i ekzekutivit, Edi Rama, nëpërmjet një postimi në “Facebook” theksoi se do të ketë zero tolerancë ndaj kujtdo që nuk zbaton ligjin. “Zero tolerancë ndaj kujtdo ndër këta, që i bëjnë karshillëk ligjit, shtetit, konsumatorit. Qasja sensibilizuese, edukative, tolerante për të mos stresuar biznesin u zgjat shumë dhe prodhoi pak sukses për kohën që mori. Qasja e re do të jetë përditë e më kërkuese, reaguese dhe ndëshkuese, pa asnjë dallim tjetër përveç kufirit të ligjit”, theksoi Rama. Edhe zëvendëskryeministri Erion Braçe doli dje në një deklaratë për mediat për të dhënë rezultatet e aksionit antiinformalitet. Sipas numrit dy të qeverisë, bizneset duhet vetëm zbatojnë ligjin, duke shtuar se për shkelësit e ligjit nuk do të ketë tolerime. “Në tregun e karburanteve vazhdon të gëlojë paligjshmëria në aspektin fiskal. Ajo është bërë aq e gjerë, deri në kufijtë e shkeljes së Kodit Penal. Diferenca në litra do t’u nënshtrohet detyrimeve fiskale deri në qindarkën e fundit. Gjatë këtyre 10 ditëve, Drejtoria e TatimPaguesve ka bllokuar llogarinë e 22 prej tyre. Disa kanë reaguar, ndërsa disa të tjerë nuk kanë reaguar. Prej tyre kanë rënë telefonat e drejtorëve, deputetëve dhe disa ministrave. Po e përsëris. Mos u lodhni kot. Asnjë telefon nuk ju ndihmon dot. Beteja për të formalizuar çdo transaksion, përfshirë edhe shërbimet në restorante dhe bare në vijën bregdetare, është fokusuar te njësitë e mëdha. Nuk kërkojmë prej tyre asgjë veç detyrimeve, kupon tatimor për çdo blerje dhe shitje. Janë mbyllur disa njësi. Nuk ju duhet as gjoba dhe as mbyllja e njësisë së tyre. Na duhet të punojnë ligjërisht dhe të paguajnë detyrimet. Ata që kanë nisur këngën që po i mbyllni për një kupon, dua t’u them se nuk bëhet fjalë për asgjë përveç zbatimit të ligjit. Secili prej tyre do kalojë në procesin e rivlerësimit”, theksoi Braçe.
KËRCËNIMI NDAJ ZV. KRYEMINISTRIT
Krahas kësaj, ai u ndal edhe te një çështje tjetër, kërcënimi i inspektorëve. Në përgjigje të interesimit të gazetarëve, Braçe la të kuptohej se edhe ai ishte kërcënuar për shkak të drejtimit të aksionit antiinformalitet. “Apel të gjithë administratorëve dhe pronarëve që kanë qenë në vëzhgim. Kërcënimet ndaj nëpunësit të shtetit do të ndëshkohen pa mëshirë. U kërkoj administratorëve të ‘ Tajvanit’ dhe ‘ Havanës’, se çdo kërcënim i paraqitur ndaj inspektorëve, do të përballen me ligjin. Çdo germë kërcënuese do trajtohet si krim. Pavarësisht se Presidenti nuk na e dha mundësinë për të vënë në zbatim Kodin Penal, ne do bëjmë aq sa na lejon ligji. Organet e Policisë së Shtetit kanë vijuar detyrën menjëherë pas kësaj. Për fat të keq dhe për fat të mirë, unë nuk dëgjoj nga ky vesh. Mos t’i bien celularit fare dhe as mos të shkruajnë në rrjetet sociale. Kush shan, merr mbrapsht mënyrën si adresohet dhe drejtohet”, tha Braçe.
QËNDRIMI PËR DAKON
Gjatë konferencës për media, numri dy i qeverisë u ndal edhe te dekretet e Presidentit Meta, të cilat kthyen për rishqyrtim në Kuvend disa projektligje. Sipas Braçes, me nisjen e sesionit të ri parlamentar, maxhoranca do të diskutojë të gjitha dekretet e kthyera mbrapsht. “Pa më të voglin diskutim. Për sa kohë rregulli thotë se ligjet duhet të shqyrtohen në Kuvend, do të diskutohen të gjitha”, nënvizoi ai. Gjithashtu, Braçe iu përgjigj interesit të medias në lidhje me Vangjush Dakon, i cili disa ditë më parë u shpall “non grata” nga Departamenti Amerikan i Shtetit. “Unë e kam thënë vazhdimisht, çdo akuzë e ngritur ndaj Dakos e gjithkujt tjetër, edhe anëtarë të Kryesisë së PS- së apo jo, apo kryetarë të partive politike si është njëri nga kryetarët e opozitës, apo nën të, duhet të hetohet dhe të gjykohet si e parashikon ligji. Askush nuk mund t’i shmanget hetimit dhe gjykimit”, pohoi ai.
KASAT FISKALE
Numri dy i qeverisë dha një përgjigje edhe ndaj kryetarit të Partisë Demokratike, Lulzim Basha, i cili prej ditësh ka akuzuar qeverinë për vendimin e marrë për ndryshimin e kasave fiskale. Sipas Braçes, për çdo akuzë që mund të ketë Partia Demokratike mund t’u drejtohet dyerve të Prokurorisë, duke shtuar se ky institucion është i hapur edhe në muajin gusht, ndonëse pjesa më e madhe e punonjësve shtetërorë janë me lejen vjetore.