Apeli i Presidentit: Zgjedhjet më 13 tetor, mundësi për integrimin
Dështimi i negociatave, Presidenti: Askush të mos lodhet të gjejë justifikime dhe alibi nëse nuk reflekton
Presidenti Meta i bëri apel maxhoranës dhe opozitës që të pranojnë gatishmërinë e OSBE- së për të negociuar për kapërcimin e krizës politike në vend.
Në një postim në faqen e tij në "Facebook", Meta thekson se kjo duhet shfrytëzuar si mundësi për të plotësuar kushtet për të marrë dritën jeshile për hapjen e negociatave për anëtarësim. Sipas kreut të shtetit, këto kushte plotësohen vetëm nëse zhvillohen zgjedhje gjithëpërfshirëse, duke kërkuar angazhim për datën e dekretuar prej tij. "Të dashur miq! Po ju rikujtoj qëndrimin tim publik në 27 qershor 2018, një ditë pasi ishin bërë të njohura konkluzionet e Këshillit për Çështjet e Përgjithshme mbi negociatat e anëtarësimit të Shqipërisë me Bashkimin Europian! Jo vetëm që u shpërdorua një vit pa bashkëpunim, përqendrim e përgjegjësi, por gjithçka u përkeqësua vetëm në interes të luftës për pushtet. Ndërkohë kanë kaluar më shumë se dy muaj nga dita kur u dhashë mundësi të dyja palëve për të realizuar zgjedhje vendore gjithëpërfshirëse. Ende kemi mundësi t'i shfrytëzojmë këto ditë, për të realizuar zgjedhje në 13 tetor 2019, si një detyrim, jo vetëm ligjor, por edhe si domosdoshmëri për të mos i mbajtur zero shanset që Shqipëria t'i çelë negociatat për anëtarësim me BE- në në 18 tetor 2019", theksoi kreu i shtetit, duke shtuar se integrimi në BE vjen vetëm duke plotësuar standardet zgjedhore të Kopenhagenit dhe jo nëpërmjet lobimit. "Askush të mos lodhet të gjejë justifikime dhe alibi nëse nuk reflekton. Çdo gjë mund të lobohet në BE, por jo injorimi i kritereve të Kopenhagenit. Zgjedhjet e lira e të ndershme janë pjesë e tyre dhe të paevitueshme. Ndaj duhet shfrytëzuar urgjent gatishmëria e drejtuesve të OSBE- së për të ndihmuar në tejkalimin e kësaj krize duke e pranuar këtë gatishmëri tani, me qëllim që jo vetëm të realizohen zgjedhjet vendore në 13 tetor 2019, por edhe të arrihet marrëveshja për reformën zgjedhore sa më parë, në mënyrë që vendi ynë të ketë mundësi të çelë negociatat në 18 tetor 2019".
QËNDRIMI
Në mesazhin e publikuar në faqen e tij në "Facebook", Presidenti Ilir Meta ripërsëriti qëndrimin e mbajtur në 27 qershor, një ditë pasi ishin bërë publike të dhënat e Këshillit të BE- së mbi integrimin e Shqipërisë. "Ashtu siç kaloi një ditë, do të kalojë dhe një vit. Konkluzionet e djeshme të Këshillit për Çështjet e Përgjithshme mbi negociatat e anëtarësimit të Shqipërisë me Bashkimin Evropian duhen mirëpritur me realizëm dhe përgjegjshmëri. Ne të gjithë duhet ta vlerësojmë dhe çmojmë vullnetin pozitiv me të cilin, si Komisioni Evropian, ashtu edhe të gjitha vendet anëtare, e mirëpresin procesin e integrimit të Shqipërisë dhe gjithë rajonit në BE. Kjo qasje duhet të na nxisë për një lexim të drejtë dhe realist të sfidave serioze që kemi përpara, veçanërisht në fushën e sundimit të ligjit. Një vit kalon shpejt, ashtu si nga dje kaloi një ditë. Provimi ynë i qershorit të ardhshëm do të jetë shumë i vështirë e kërkues, pasi edhe vetë Bashkimi Europian do të ketë provimin e tij zgjedhor në të njëjtën kohë. Ndaj, i ftoj të gjithë për përqendrim, përgjegjësi dhe bashkëpunim", është shprehur ai. Periudha e gushtit ka qenë një fazë me kritika dhe apele për Presidentin, ku disa herë ka akuzuar maxhoranën se nuk pranon rrotacionin dhe nga krahu tjetër ka kërkuar nga opozita që të jetë e bashkuar për zgjedhje gjithëpërfshirëse.