Valdrin Pjetri: Zhurmë ndaj abuzimeve në bashki. PD: Sot publikojmë letrat
Aktivistë të djathtë kanë shpërndarë dje disa trakte nëpër qytet, ku shkruhet ' Narko Valdrini Jashtë Bashkisë'. Lidhur me këtë ka reaguar edhe vetë Valdrin Pjetri. Ai shkruan se këto trakte që janë shpërndarë nga katër- pesë persona nuk përfaqësojnë interesat e qytetarëve shkodranë dhe as interesat e demokratëve të ndershëm. "Traktet e shpërndara natën nëpër Shkodër, organizuar nga 4- 5 persona, nuk përfaqësojnë interesat e qytetarëve shkodranë dhe as interesat e demokratëve të ndershëm shkodranë. Thjesht duan të largojnë vëmendjen nga abuzimet shumëvjeçare të bëra në Bashkinë Shkodër dhe nuk e ndryshojnë dot faktin se pas një jave ky abuzim do përfundojë njëherë e mirë", shkruan Pjetri në reagimin e tij në "Facebook". Ai shprehet se nuk është ai e keqja e këtij qyteti dhe se nuk ka shpërdoruar asnjë fond publik. "Valdrin Pjetri nuk është e keqja e Shkodrës. Nuk është ai që ka abuzuar dhe ka shpërdoruar pafund fonde publike. Valdrin Pjetri nuk është shkaktar i gjendjes së mjerueshme, ku gjendet qyteti i Shkodrës sot. Në pak muaj, të gjithë banorët e Shkodrës do shikojnë realitetin ndryshe, të një qyteti që do administrohet dhe menaxhohet me përkushtim dhe devotshmëri. Qentë le të lehin, karvani ecën përpara. Ditë më të mira do vijnë për Shkodrën dhe banorët e saj", përfundon reagimin e tij Pjetri. PD- ja ka ngritur pretendime ndaj Pjetrit, se ai ka probleme me shtetin italian, madje ka bërë edhe një kërkesë në Prokurori për të verifikuar nëse ai ka fshehur te kaluarën në formularin e dekriminalizimit. Edhe pse Pjetri i ka mohuar akuzat edhe më parë, duke thënë se është i hapur për çdo lloj verifikimi, PD- ja nuk është ndalur me akuzat ndaj tij. I gjendur në këtë situatë, Pjetri ka publikuar dy certifikata, ku në to deklarohet nga organet në Itali se ai nuk ka probleme dhe se nuk është marrë kurrë si i pandehur. Por selia blu lajmëroi dje se do të publikojë sot dokumentet që tregojnë të kaluarën e kryebashkiakut të ri Valdrin Pjetri në Itali. "Nesër shqiptarët do kenë mundësi të shikojnë me letra ( dhe jo trakte) se çfarë është për përfaqësuesin politik të Edi Ramës në Qarkun Shkodër data 27 janar 2003. Deri nesër ke kohë për të ëndërruar përralla me qentë e karvanët, që po të çojnë përpara drejt greminës", shkruan dega e PD- së Shkodër. Sipas saj, dokumentet vijnë nga autoritetet ligjzbatuese italiane. "Mos u shqetëso nga letrat e reagimit qytetar, që me urdhër të Edi Ramës i quan trakte. Ato nuk të çojnë në burg! Shqetësohu nga letrat e autoriteteve ligjzbatuese italiane, QË NUK JANË TRAKTE dhe që provojnë se je një person i dënuar për trafik droge. Këto letra të ndalojnë të uzurposh zyrën e kryetarit të Bashkisë Shkodër, të çojnë në burg për falsifikimin e formularit të dekriminalizimit dhe të bëjnë subjekt të menjëhershëm të ligjit antimafia. Në këtë të fundit nuk të ndihmon dot as Edi Rama, as Tom Doshi, as babai dhe as vëllai. Deri nesër ke kohë për të ëndërruar përralla me qentë e karvanët, që po të çojnë përpara drejt greminës", thuhet në deklaratën e PD- së Shkodër.