"13 tetori", nesër skadon afati për koalicionet
Presidenti Meta ka caktuar me dekret zhvillimin e zgjedhjeve vendore në datën 13 tetor. Këtë vendim, ai e mori pasi vendosi me dekret anulimin e datës 30 qershor për zhvillimin e zgjedhjeve për organet e vetëqeverisjes vendore. Ky vendim i marrë nga kreu i shtetit u hodh poshtë nga KQZ- ja dhe nga maxhoranca, të cilat vijuan në organizimin e zgjedhjeve më 30 qershor. Por, për kreun e shtetit, data e ligjshme për organizimin e zgjedhjeve vendore është 13 tetori. Deri më tani në KQZ janë paraqitur vetëm tri subjekte zgjedhore, të cilat kanë respektuar këtë vendim të Presidentit Meta. Konkretisht Partia Republikane, Partia Agrare Ambientaliste dhe Lëvizja Socialiste për Integrim. Këto parti u regjistruan në afatin ligjor të parashikuar. Por Partia Demokratike nuk ka paraqitur ende asnjë shkresë për t'u bërë pjesë e procesit zgjedhor të caktuar nga Presidenti. Gjithsesi, afati i fundit për regjistrimin është data 14 gusht. Sipas Kodit Zgjedhor, parashikohet se koalicionet regjistrohen 60 ditë përpara datës së zgjedhjeve. "Dy ose më shumë parti politike të regjistruara si subjekte zgjedhore në KQZ, sipas nenit 64 të këtij Kodi, mund të regjistrohen në KQZ si koalicion zgjedhor në shkallë vendi jo më vonë se 60 ditë përpara datës së zgjedhjeve", theksohet në Kodin Zgjedhor. Rrjedhimisht, nëse opozita e bashkuar do të bëhet pjesë e procesi zgjedhor, do të duhet që të regjistrohet brenda datës 14 tetor pranë Komisionit Qendror të Zgjedhjeve. Ky institucion nga ana e tij ka marrë zyrtarisht pushimet vjetore, por zyra e protokollit që merr në administrim kërkesa, vijon të jetë e hapur.