Peticion kundër memorialit: Shkel vlerat demokratike
Heqja e memorialit turk, heqja e emrit të rrugës “Rruga e Dëshmorëve të 15 Korrikut”, si dhe heqja e emërtimit “Parku i Demokracisë 15 Korriku”, është kthyer në një kauzë të re. Gjatë ditës së djeshme ka nisur të qarkullojë një peticion on- line, hapur në faqen e njohur të peticioneve, Change. org, i cili nisi të nënshkruhet me shpejtësi. Ky peticion i drejtohet Këshillit Bashkiak në Tiranë. Në peticion shkruhet:
“Ne kërkojmë heqjen e emërtimit ‘ Rruga e Dëshmorëve të 15 Korrikut’, heqjen e emërtimit ‘ Parku i Demokracisë 15 Korriku’ dhe heqjen e pllakës përkujtimore me emrat e të ashtuquajturve ‘ dëshmorë të 15 korrikut’, të gjitha në Parkun e Liqenit.
Vendimi sekret për të përjetësuar një ngjarje të brendshme turke është marrë në shkelje të ligjeve të Shqipërisë dhe të rregullave të Bashkisë Tiranë. Vendimi është marrë pa asnjë dëgjesë apo konsultim publik, duke u mohuar qytetarëve të Tiranës të drejtën për t’u shprehur për të.
Ngjarja dhe viktimat që Bashkia Tiranë ka vendosur të përjetësojë nuk kanë asnjë lidhje me popullin dhe kombin shqiptar dhe aq më pak me qytetarët e Tiranës. Ngjarja që Bashkia ka vendosur të përjetësojë: nuk ka domethënie apo rëndësi historike, kulturore apo shpirtërore për qytetarët shqiptarë;
nuk ka vlerë përkujtimore apo simbolike për brezat e ardhshëm;
nuk ka rëndësi historike apo kulturore botërore dhe nuk ka domethënie për vlerat e lirisë, demokracisë dhe përparimit njerëzor botëror;
nuk ka mbështetje apo pranim të gjerë shoqëror mes qytetarëve të Tiranës.
Ne dyshojmë se veprimet e Bashkisë Tiranë janë shërbim personal ndaj Presidentit turk Rexhep Tajip Erdogan, motivuar nga interesa të ngushta vetjake të Kryeministrit Edi Rama dhe kryebashkiakut Erion Veliaj. Si të tilla, ato janë shkelje e sovranitetit të vendit dhe dhunim i krenarisë sonë kombëtare.
Nënshtrimi i qeveritarëve tanë ndaj një autokrati të njohur për persekutimin e kundërshtarëve politikë, për burgosjen e gazetarëve dhe shtypjen e të drejtave të njeriut është gjithashtu shkelje e vlerave demokratike perëndimore, të cilat aspiron shoqëria shqiptare”.