Kuotat për 2019- 2020, më pak studentë të rinj në Universitet
Në mbledhjen e datës 6 maj, Universiteti i Tiranës, me vendim Senati, ka kaluar numrin e pranimeve për vitin e ardhshëm akademik, ashtu siç e kërkon ligji i arsimit të lartë, duke vënë në dijeni maturantët mbi mundësitë e pranimit për kuotat në 36 profilet që ofron. 5435 studentë të rinj do të hyjnë për herë të parë në Universitetin e Tiranës për studime bachelor. Pas rritjes së vazhdueshme të kuotave të pranimit, Universiteti i Tiranës ka vendosur të bëjë disa hapa prapa, duke ulur numrin e studentëve që do të pranojë. Gërshërët e shkurtimeve kanë prekur kryesisht fakultetet e edukimit, duke ulur me 10- 20 kuota për degë. Nga pesë programe studimi te Histori- Filologjia, tre prej tyre do të rrudhen. Më konkretisht, Gazetaria do të ofrojë 100 vende nga 120 vitin e kaluar, po ashtu edhe Arkeologjia do të ketë 20 kuota më pak, ndërsa Gjuhë- Letërsia do të ofrojë 15 vende pranimi më pak, 165 nga 180 të tilla. Në Fakultetin e Shkencave të Natyrës, gërshërët kanë prekur vetëm Fizikën, në të cilën do të futen dhjetë studentë më pak se vjet, ndërsa te Gjuhët e Huaja preket Italishtja me më pak se 20 kuota. Gjuha Ruse i është shmangur trendit të shkurtimeve, duke pranuar 10 studentë më shumë në garën e këtij viti. Po ashtu, te Shkencat Sociale, e vetmja lëndë edukimi që pëson ulje është Sociologjia ( 20 kuota më pak). I vetmi fakultet që ruan të pandryshueshëm numrin e pranimeve është ai i Ekonomisë, me përjashtim të filialeve të tij, ku i është kërkuar e miratuar rritja për degën Administrim Biznes, ndërsa te Anglishtja ka një rrjedhje të lehtë prej 5 vendesh. Fakulteti i Drejtësisë i qëndron të njëjtës shifër pranimesh.