Irani paralajmëron: Pranitë ilegale në Hormuz mund të çojnë në luftë
Komandanti i Flotës së Gardës Revolucionare Iraniane, Alireza Tangsiri, ka bërë një kërcënim të hënën para gazetarëve, duke u shprehur se “çdo prani e paligjshme në ujërat e Gjirit Persik mund të nisë një luftë”. Deklarata e tij vjen pas raportimeve se Izraeli mund të jetë pjesë e një misioni të drejtuar nga SHBA për të siguruar anijet e huaja në Ngushticën e Hormuzit. Kjo Ngushticë që kalon ndërmjet Iranit, Omanit dhe Emirateve të Bashkuara Arabe, është një nga lokacionet më strategjike në botë, ku Irani së fundmi ka sekuestruar disa anije cisterna, duke përshkallëzuar tensionet pas sanksioneve të SHBA- së, që pasuan tërheqjen e Presidentit Donald Trump nga marrëveshja nukleare e vitit 2015. Në një intervistë për televizionin “Al- Mayadeen” të vendosur në Liban, Tangsiri ka paralajmëruar: “Në çdo kohë që komandantët tanë do të dëshirojnë, ne jemi në gjendje të kapim çdo anije, edhe nëse do të jetë e shoqëruar nga forcat amerikane apo britanike”. Javën e kaluar u raportua se ministri i Jashtëm izraelit, Israel Katz, ka thënë në një seancë me dyer të mbyllura të Komitetit të Mbrojtjes dhe Çështjeje të Jashtme, Knesset, se Izraeli ishte i përfshirë në përpjekjet e SHBA- së për të krijuar siguri detare në Ngushticën e Hormuzit. Katz tha se partneriteti me SHBA- në ishte në interesin strategjik të Izraelit për të kundërshtuar Iranin dhe për të forcuar lidhjet me vendet e Gjirit. SHBA dhe vendet e Gjirit e kanë akuzuar Republikën Islamike të Iranit se po sulmon anijet e huaja me naftë. Në përgjigje, SHBA ka nisur një mision, operacioni “Sentinel”, në një përpjekje për të siguruar qarkullim të lirë në ujërat e Gjirit.