Itali, partitë kundër Salvinit përpiqen të shmangin zgjedhjet
Sot pritet vendimi i Senatit për votën e besimit të qeverisë
Krerët e grupeve politike të Italisë nuk kanë arritur të bien dakord se kur duhet të mbajnë një votë mosbesimi, mes një krize qeverie të shkaktuar nga kreu i Legës, ministri i Brendshëm i Italisë, Matteo Salvini.
Ai u tërhoq nga koalicioni e tij populist dhe tani dëshiron një votim urgjent besimi të qeverisë dhe zgjedhje të reja. Hapi tjetër do të vendoset nga një seancë e plotë e Senatit që mbahet sot, e martë. Sipas “BBC”- së, partneri i ish- koalicionit të Salvinit e ka akuzuar atë se po tradhton elektoratin pas 14 muajsh qeverisjeje. Lëvizja Pesë Yjet e Luigi di Maio- s mori pushtetin me Legën nacionaliste në qershor 2018, por marrëdhëniet mes tyre janë rrënuar. Arsyeja që Salvini po kërkon medoemos zgjedhje të reja, nuk është vetëm situata e mosmarrëveshjeve në koalicionin e çuditshëm italian, që ka bashkuar dy skaje të kundërta të politikës, por janë sondazhet që e tregojnë popullaritetin e tij në majat më të larta, pas qëndrimit kundër emigracionit. Kështu, Salvini beson se tashmë mund ta qeverisë Italinë i vetëm, mbase pa partner koalicioni ose nëse do të duhet të zgjedhë partnerë, do të marrë nga krahu i djathtë të cilit i përket. Qeveria drejtohet nga një Kryeministër i pavarur, Giuseppe Conte, dhe një votë mosbesimi do ta rrëzonte atë. Senati tani do të duhet të vendosë nëse do të thërrasë një votim për ditën e mërkurë ose të presë deri më 20 gusht, kur Conte të raportojë në Parlament. Udhëheqësi i Legës mund të jetë duke udhëhequr sondazhet, por ai nuk komandon një shumicë në Senat, kështu që përpjekja e tij për të detyruar zgjedhjet e parakohshme në tetor mund të përmbyset. Salvini përballet me kundërshtimin e Luigi Di Maio- s dhe gjithashtu të Partisë Demokratike të qendrës së majtë ( PD), e cila drejtonte qeverinë vitin e kaluar. Ish- drejtuesi i PD- së, Matteo Renzi, është rikthyer në arenën politike me një thirrje për të ndaluar nxitjen “e çmendur” të Salvinit për zgjedhje, duke propozuar në vend të tyre një qeveri kujdestare, “institucionale”, të mbështetur nga Parlamenti. Por, Di Maio nuk ka pranuar të punojë me të, duke thënë se “askush nuk dëshiron të ulet në tryezë me Renzi- n”. Drejtuesi i Lëvizjes Pesë Yjet, Luigi di Maio, këmbëngul se reforma e Parlamentit duhet të vijë para zgjedhjeve. Ai dëshiron të ulë numrin e vendeve në dy dhomat e Parlamentit në Itali nga 945, në 345 para zgjedhjeve të reja. Qendra e majtë në parim mund ta mbështesë këtë.
Vetëm Presidenti i Italisë, aktualisht me pushime në një varkë në Sardenjë, ka fuqinë për të shpërndarë Parlamentin. Ai ka këmbëngulur se buxheti i vitit të ardhshëm duhet të miratohet këtë vjeshtë dhe dritarja për zgjedhje të parakohshme është shumë e vogël.