Ligji 7501 në “Venecia”, afati i ri për hipotekimin
TAPITE E PRONAVE
Projektligji i ri i Qeverisë për përfundimin e proceseve kalimtare të pronësisë dërgohet në Komisionin e Venecias. Afati i ri për tapitë e tokave me 7501
Në fund të vitit 2018, qeveria shqiptare paraqiti në Parlament një paketë ligjore, e cila synonte reformimin e sistemit të pronësisë në Shqipëri. Konkretisht, ishin dy projektligje, njëri për krijimin e Agjencisë Shtetërore të Kadastrës dhe tjetri ishte ai "Për përfundimin e proceseve kalimtare të pronësisë në Republikën e Shqipërisë". Ligji për Agjencinë Shtetërore të Kadastrës synonte shkrirjen e tri institucioneve, konkretisht, ALUIZNI- t dhe Zyrës së Regjistrimit të Pasurive të Paluajtshme. Gjatë shqyrtimit të kësaj nisme në komisionet parlamentare, deputetët kërkuan që në këtë agjenci të re që po krijohej, të shihej mundësia të shkrihet edhe Agjencia për Trajtimin e Pronës, e cila ka në objekt trajtimin e faturës financiare për kompensimin e ish- pronarëve. Por, Artan Lame, kryetari i Agjencisë Shtetërore të Kadastrës, në atë kohë prezantuesi i reformës së pronësisë, theksoi se ATP- ja nuk mund të preket, për shkak se ligji për funksionimin e këtij institucioni është në monitorim nga Gjykata Europiane për të Drejtat e Njeriut në Strasburg, për rrjedhojë, ndryshimi i saj mund të sillte keqkuptime nga ana e Gjykatës së Strasburgut. Kësisoj, deri më tani janë dy ligje, të cilat janë nën shqyrtim nga institucionet evropiane. I pari është ai për kthimin dhe kompensimin e ish- pronarëve, tjetri është ligji për "Për përfundimin e proceseve kalimtare të pronësisë në Republikën e Shqipërisë", i cili po shqyrtohet nga Komisioni i Venecias, institucion ky që pritet të japë një opinion mbi këtë nismë ligjore.