Tokat me 7501, afat deri më 31 dhjetor për hipotekimin e tyre

Si do të bëhet kalimi në pronësi të AMTP- ve të ndara me 7501 Miratimi i ligjit të ri deri në opinionin e Komisionit të Venecias, lë në fuqi regjistrimin e tokave sipas formulës fillestare

Ngrirja e ligjit "Për përfundimin e proceseve kalimtare të pronësisë në Republikën e Shqipërisë" deri në marrjen e një opinioni nga Komisioni i Venecias, ka lënë në fuqi ligjin e vjetër.

Konkretisht, në muajin shkurt të këtij viti u miratuan në Parlament dy ndryshime ligjore të propozuara nga zëvendëskryeministri Erion Braçe, të cilat theksonin shtyrjen e afatit për regjistrimin e akteve të tokave të marra në përdorim deri në 31 dhjetor të këtij viti. Kësisoj, zyrat e Kadastrës mund të pranojnë kërkesa për kalimin në pronësi të tokave të marra në përdorim sipas ligjit 7501 deri në fund të këtij viti, kohë në të cilën është parashikuar të miratohet edhe drafti, i cili po shqyrtohet nga ekspertët e Komisionit të Venecias.

LIGJET

Dy ligjet e miratuara nga Parlamenti në shkurt të këtij viti nuk parashikojnë vetëm shtyrjen e afatit deri në 31 dhjetor, por edhe ndryshimin e disa procedurave lehtësuese për këtë procedurë. Sipas raportit të miratuar për këto ligje, theksohet se: "Qëllimi i këtij projektligji është rishikimi i disa dispozitave të ligjit aktual, të cilat kanë krijuar problematika në zbatimin e tij dhe që janë të lidhura me çështjet: Shumë familje bujqësore apo pjesëtarë të këtyre familjeve, të cilët kanë përfituar tokë në përdorim sipas dispozitave të ligjit dhe akteve nënligjore në fuqi, nuk mund të pajisen me aktin e marrjes në pronësi të tokës për shkak të kufizimeve të vendosura në legjislacion për mosndryshimin e vendbanimit; Për shkak të vonesave për transferimin e dokumentacionit të gjendjes civile përtej afateve të përcaktuara në legjislacion, shumë familje bujqësore pavarësisht se kanë qenë banorë ' de facto' të njësive vendore të ish- ndërmarrjeve bujqësore, nuk mund të pajisen me aktin e marrjes së tokës në pronësi; Komisionet e tokës ne fshat, në shume raste nuk kanë plotësuar të plotë dhe të saktë dokumentacionin për përfitimin e aktit të marrjes së tokës në pronësi ( AMTP) për të gjitha familjet bujqësore, pavarësisht se këto familje i plotësonin kriteret ligjore për të qenë përfitues". Për zgjidhen e këtyre problemeve, ligji parashikon se përfitojnë: "Familjet bujqësore ose individët, të cilët përmbushin kushtet si më poshtë: Janë punonjës të ish- ndërmarrjes bujqësore më 1.8.1991, gjendja civile e të cilëve u është transferuar në fshatin ku gjendet toka objekt i kalimit në pronësi, pas datës 1.8.1991, por të mos kenë përfituar tokë bujqësore në përdorim apo pronësi, në fshatin ku kanë pasur gjendjen civile më 1.8.1991; E përdorin tokën për veprimtari bujqësore, por kanë mungesa në plotësimin e dokumentacionit të përdorimit apo pronësisë; Familjet bujqësore ose individët, të cilët nuk kanë qenë punonjës të ishndërmarrjeve bujqësore, por kanë qenë banorë të fshatit ku gjendet toka bujqësore, objekt i kalimit të pronësisë, sipas regjistrit të gjendjes civile më 1.8.1991, por të mos kenë përfituar më parë tokë bujqësore në përdorim apo pronësi; Familje bujqësore ose individët që e përdorin tokën për veprimtari bujqësore, por kanë mungesa në plotësimin e dokumentacionit të përdorimit apo pronësisë".