Rama: Pjetri dhe PS, rrugë të ndara deri sa të dalë e vërteta
"Jo Valdrini, po vëllai im të jetë, s'ka shans të hedhë asnjë hije dyshimi mbi PS dhe mbi mua"
Kryeministri Edi Rama u shpreh dje se, deri sa të dalë e vërteta ligjore mbi të shkuarën e kryebashkiakut të ri të Shkodrës, PS- ja distancohet nga Valdrin Pjetri. Reagimi i Ramës erdhi menjëherë pasi PD- ja bëri publike dokumentet italiane, që tregonin dënimin e tij në Itali.
Në tri postime në "Twitter", Rama thekson se "përgjegjësia për çdo akt individual të padenjë është individuale. Përgjegjësia jonë është si reagojmë ndaj një akti të padenjë individual". "Jo Valdrini, po vëllai im të jetë, s'ka shans të hedhë asnjë hije dyshimi mbi PS- në dhe mbi mua, në raport me ligjin e me besnikërinë ndaj popullit! Përgjegjësia për çdo akt individual të padenjë është individuale. Përgjegjësia jonë është si reagojmë ndaj një akti të padenjë individual. I edukuar, i zoti, i respektuar familjarisht në Shkodër e kudo ka punuar, po kjo s'mjafton më. Kurrë s'kam menduar se Valdrini mund të fshehë të vërtetën në raport me ligjin, po deri kur e vërteta ligjore të dalë, Valdrin Pjetri dhe Partia Socialiste i kanë rrugët e ndara plotësisht", shkruan Rama. Duke iu përgjigjur akuzave të shpeshta të bëra ditët e fundit se ka marrë në mbrojtje kryebashkiakun e ri të Shkodrës, Rama shprehet se me ligjin secili ka raport personal. "E me këtë rast, të tërë ta fusin mirë në kokë: Unë s'kam ndërmend të toleroj askënd dhe as të marr përsipër raportin individual me ligjin të askujt. Shkoj në luftë për çdo ide, qëllim a shok armësh, po kosto veprimesh individuale të dyshuara si ky, as marr më, as lejoj më t'i marrë PS- ja", shkruan Rama në "Twitter".
BALLA
Më herët, sekretari i përgjithshëm i PS- së, Taulant Balla, tha se vija e kuqe që PS ka vendosur me zbatimin e ligjit nuk përjashton as Valdrin Pjetrin. Me një shënim në faqen e tij në "Facebook", Balla thekson se, "Në raport me ligjin e me drejtësinë dhe pa diskutim edhe me këtë aspekt specifik të legjislacionit shqiptar, lidhur me pastërtinë e figurave që ushtrojnë funksione publike, Partia Socialiste ka përcaktuar qartë një vijë të kuqe për të gjithë anëtarët e saj. Kjo vijë e kuqe nuk përjashton askënd, që nga kryetari i partisë deri tek anëtari i thjeshtë. Për Partinë Socialiste, të gjithë janë të barabartë para ligjit, askush nuk është mbi ligjin dhe ligji është mbi çdo individ dhe interes politik". Balla hodhi poshtë deklaratat e sekretarit të përgjithshëm të PD- së, Gazment Bardhi, për informacionet nga rrugët diplomatike. "Për Partinë Socialiste, qoftë pretendimet e opozitës jashtëparlamentare, qoftë sqarimet e dhëna nga Valdrini, përshirë edhe publikimin e dokumentacionit përkatës nga Italia ( të vënë më parë në dispozicion prej tij, kur ne kemi kryer si për çdo kandidaturë të gjitha verifikimet ligjore që mundëson statusi ligjor i organizatës sonë), nuk mjaftojnë. Me këtë rast, hedhim poshtë me neveri akuzat lidhur me ndonjë marrje në dijeni nga burime të ashtuquajtura ' diplomatike' apo të çfarëdo lloji tjetër, mbi pretendimin e Partisë Demokratike. Kjo është tërësisht e pavërtetë dhe do t'i referohet Gjykatës në formën e padisë, njësoj si për shpifje të tjera", tha Balla.